Ji Tevgera Jinên Azad (TJA) Sebahat Tûncel di Newroza Stenbolê de axivî û got,” Newroz bi rehetî nehat afirandin. Li dijî zaliman, li dijî zilmê bi agirê Kawayê Hesinkar ji aliyê gelan ve heta vê serdemê hate anîn. Ne tenê beiya 3 hezar salî, li hemberî Dehaqên demê jî ev agir hate daan. Li Zindana li Amedê li dijî zilmê Mazlûm Dogan bi sê derbikên niftikê Newroz da destpêkirin û bi Zekiye Alkan agirê Newrozê gur bû. Rahşan, Ronahî û Bêrîvanan ev agir geş kirin. Ev agir agirekî pîroz e. Silav ji wan re yên ku ev agir gihandine vê rojê.”
Sebahat Tûncel di dewama axaftina xwe de got, “Serok Apo li gel ku bi salan e di nava mercên giran ên tecrîdê de ye ji bo gelê Kurd û gelên Rojhilata Navîn li ber xwe dide, dixebite. Em silavan jê re dişînin. Em dixwazin di Newroza pêş de bi Serok Apo re li Amedê agirê Newrozê dadin.
Heta niha gotin nema ku nehatiye gotin. Di peyama Birêz Ocalan de tiştekî girîng hebû. Em dixwazin Newrozê êdî bi rengekî rasteqîn pîroz bikin ne weke utopyayekê.”
Sebahat Tûncel anî ziman ku pêvajoya di 27’ê Sibatê de ji aliyê Rêber Apo ve hate destpêkirin girîng û bi wate ye û got, “Em dixwazin utopyayê pêk bînin. Em dixwazin azad bin. Kurd azad bin, jin azad bin. Weke TJA, weke jinên Kurd em ji vê derê soz didin; em ê azadiyê ava bikin. Em ê sosyalîzma demokratîk ava bikin.”
Sebahat Tûncel ragihand ku berpirsyariyên dewletê hene ku divê bi cih bîne û got, “Divê tavilê pêşî li siyaseta demokratîk veke. Garantiyên hiqûqî bi cih bîne.”
Di dawiya axaftina xwe de Sebahat Tûncel got, “Li cihekî weke Rojhilata Navîn ku şer diqewime, em dixwazin aştiyê ava bikin. Em dixwazin di navbera gelan de pira biratiyê ava bikin.”
