Efserê îstîxbarata serdema Baasê Salim El-Cumeylî, li ser rûpela xwe ya tora medya dijîtal a X’ê ragihand ku serokê îstîxbarata serdema Baasê Tahir Celîl Hebûş miriye.
Tişta di peyamê de bal kişand, ji bo Tahir Celîr Hebûş li Hewlêrê di Mizgefta Celîl Xeyat de ji bo sê rojan şîn tê danîn!
Tahir Celîl Hebûş, di sala 1950’an de li Tikrîtê ji dayik bû. Ew kesekî nêzîkî Sedam Huseyn bû û di pêvajoya Enfalê, Enfala Barzaniyan, kuştina çalakvanên siyasî yên Kurd û zilma Raperînê de roleke mezin hebû.
Di dema xwe de Hebûş ragihandibû ku Enfal pêvajoyek rast bû û ji bo sepandina yasayê bûye. Her wiha di serdema desthilatdariya Baasa faşîst de van postan wergirtiye:
-Waliyê Zîqarê
– Waliyê Wasitê
-Rêveberê Giştî yê Polîsan
-Rêveberê Nivîsgeha Elî Kîmyewî
-Rêveberê Asayîşa Giştî
-Postê wî yê dawî jî Serokê Saziya Îstîxbarata Baasê bû.
Piştî rûxandina rejîma Baasê, Emerîkayê yek mîlyon dolar xelat danîbû ji bo her kesê ku cihê wî eşkere bike.
Tevî ku parastin û veşartina endamên partiya Baasa faşîst li gorî yasaya ‘Tunekirina Koka Baasê’ wek sûc tê hesibandin, lê piştî sala 2004’an hejmareke berçav ji endam û serkirdeyên payebilind ên rejîma Baasa dîktator li Hewlêrê mirine.
Aliyên Şîe yên Iraqê gelek caran bi mebesta bermayiyên Baasê li bajarê Hewlêrê û ji aliyê PDK’ê ve tên parastin, êriş dikin ser Herêma Kurdistanê. Her tim vê yekê jî wek çek û kartekê li dijî Herêmê di demên cuda de bi kar tînin.
