Kongreya bi dirûşmeya “Edalet, Azadî û Demokrasiyê” li navenda Şengalê bi beşdariya 200 delege, mêvan, nûnerên partiyên siyasî, rêxistinên jinan, Rêveberiya Meclîsa Gel a Şengalê û kesayetên naskirî yên Êzidî pêk hat. Di kongreyê di bin çavdêriya Desteya Hilbijartinên Serbixwe ya Partiyên Siyasî ya Iraqê bi rê ve çû.
Piştî deqeyeke rêzgirtinê ji bo bîranîna cangoriyên fermanê Merwan Xwedêda axaftina destpê kir, avabûna partiyê li civaka Êzidî pîroz kir. Merwan Xwedêda got, “Em Partiya Ciwanên Êzîdî di kongreya xwe ya yekemîn de radigihînin. Ev partî wekî partiyeke Iraqî ya niştîmanî tê naskirin ku armanca wê yekkirina gotinê, xurtkirina hebûna xwe di qada siyasî de û parastina berjewendiyên gel û welatê me bi hevkariya hemû aliyane.”
Merwan Xwedêda spasiya hemû damezrîner û beşdarên kongreyê kir û wiha axaftina xwe domand: ‘‘Em spasiya xwe pêşkêşî hemû damezrîner û beşdaran dikin. Her wiha spasiya hemû hevalên me yên di avakirina partiyê de ked dane dikin. Her wiha em spasiya Şaxê Partî û Rêxistinên Siyasî yê Komîsyona Hilbijartinan, her wiha Daîreya Partî û Rêxistinên Siyasî ya Komîsyona Hilbijartinan a Bexdayê dikin ji bo hevkariya wan a ku bû sedema serkeftina vê damezrandinê. Em ji Xwedê dixwazin û hêvîdarin ku ev gav bibe destpêka xebateke ku xizmeta civaka me bike û rûmeta wê biparêze.’’
Piştî axaftina vekirinê, dîwana kongreyê ji aliyê delegeyan ve hate hilbijartin. Dîwanê bernameya siyasî û rêziknameya partiyê pêşkêşî delegeyan kir û piştî nîqaşan, ev her du belge ji aliyê endaman ve hatin pejirandin. Di berdewamiya kongreyê de, bi amadebûn û çavdêriya Komisyona Serbixwe ya Partiyên Siyasî ya Iraqê, hilbijartina endamên mekteba siyasî û rêveberiya partiyê dê pêk were.
Kongre wê piştî nîvro jî dewam bike.
