Kongerya yekemîn a.Partiya Ciwan a Êzidî bi dirûşmeya ‘Edalet, Azadî û Demokrasî’ û bi tevlîbûna 200 delege û mêvanan li Hola Hannover a li navenda Şengalê di saetên serê sibehê de destpê kir.
Kongre piştî peyama destpêkirinê, bi hilbijartina dîwana rêvebirina kongreyê destpê kir. Paşê bernameya siyasî û rêziknameya partiyê hatin xwendin û pêşkêşî dengdanê hatin kirin. Piştî pejirandina rêzikname û bernameyê, navên amadekirî yên ji bo mekteba siyasî hatin xwendin; her wiha gelek ciwanên ji nav delegeyan jî xwe ji bo endamtiyê pêşniyar kirin. Piştî xwendina navan, namzetan yek bi yek xwe dan naskirin û dengdan destpê kir.
Kongre di bin çavdêriya Komîsyona Partiyên Siyasî de hat birêvebirin. Piştî bidawîbûna dengdanê, 13 kes wekî endamên mekteba siyasî ya partiyê ji aliyê komîsyonê ve hatin ragihandin û pîrozkirin.
Di dawiya Kongreyê de ji aliyê Merwan Xwedêda ve daxuyaniyek hate dayîn. Merwan Xwedêda diyar kir ku kongreya wan bi serkeftî bi encam bûye û got: “Li gorî rênimayên ku ji aliyê Komîsyona Partiyên Siyasî ve hatibûn diyarkirin, me kongreya xwe li dar xist. Endamên mekteba siyasî ku ji 13 kesan pêk tên, hatin hilbijartin.“
Merwan Xwedêda navê kesên hatine hilbijartin xwendin û kongre li hemû endaman pîroz kir.
Tê payîn ku serok û cîgirên partiyê, di rojên pêş de di civîna endamên mekteba siyasî de werin hilbijartin.
