Komîteya Koçberên Serêkaniyê îro bi Parêzgarê Hesekê Endazyar Nûredîn Ehmed re, di çarçoveya hewldanên berdewamên ên çareserkirina pirsgirêka vegera koçberan li warên xwe de, civiyan. Di civînê de mekanîzmayên pratîkî û prosuderên girêdayî vê dosyayê hatin gotûbêjkirin.
Di civînê de bi awayekî hûrgilî rewşa koçberan û astengiyên rûbirûyî vegera wan hatin nîqaşkirin, gavên ji bo dabînkirina jîngeheke guncaw di nêztirîn dem de ku vegera birûmet û mayînde misoger dike hatin pêşkêşkirin.
Komîteyê daxwazên şêniyan; weke pêwîstiya çareserkirina aliyên ewlehiyê ji bo serxistina xebata vegerê, pirsgirêkên îdarî, rêxistinî û yasayî yên girêdayî birêvebirina herêmê û gundewaran piştî vegerê pêşkêş kirin.
Girêdayî mijarê, bal li ser parastina mafê milkiyeta şêniyan, misogeriya vegera mal û milkên wan bêyî tu astengiyan hat kişandin.
Parêzgarê Hesekê Nûredîn Ehmed diyar kir ku dosyaya vegera koçberan di mijara sereke ya civînan de ye û piştketinek berbiçav çêkiriye. Ji bo serxistina xebata jinûve vegera aramiyê ew bi aliyên Şamê û tîma serokatiyê re di nava têkiliyan de ne.
Parêzgar bal kişand ser pêwîstiya çareserkrina van astengiyan nexasim aliyê ewlehiyê û anî ziman ku ji bo rakirina astengiyên li pêşiya vegera koçberên Serêkaniyê dibin bend û berçavgirtina taybetmendiya herêmê xebat dewam dikin.
Di civînê de her du aliyan li hev kir ku hevkarî û peywendiya rasterast berdewam bikin, xebata hevbeş di qonaxa bê de were zêdekirin da ku tevahî tedbîrên guncaw werin temamkirin, şert û mercên guncaw ên vegera koçberên tevahî bajar û gundan werin amadekirin.
