Êzıdî her sal di roja Çarşema yekem a piştî 13’ê Nîsanê de Cejna Çarşema Sor pîroz dikin. Ev cejn ku wekî sembola ji nû ve zayînê û destpêka biharê tê hesibandin, îsal bi çalakiyên curbicur li gelek bajaran hat pîrozkirin.
AMED
Li taxa Bahçeçîk a navçeya Sûrê ya Amedê pîrozbahiya Çarşema Sor hat lidarxistin. Rêveberên Partiya Wekhevî û Demokrasiyê ya Gelan (DEM Partî), ligel Hevşaredarên Şaredariya Sûrê Fatma Gulan Onkol û Adnan Orhan, ji bo pîrozkirina cejnê serdana malbateke Êzidî ya li taxê kirin. Hevşaredaran cejn li malbatê pîroz kirin û destnîşan kirin ku bawerî û çandên cuda dewlemendiyeke civakî ne.
ÊLIH
Cejna Çarşema Sor li gundê Korix ê bajarokê Awiské yê navçeya Qubîn a Êlihê hat pîrozkirin. Nûnerên partiyên siyasî û rêxistinên civaka sivîl beşdarî pîrozbahiyê bûn.
Hevseroka Partiya Wekhevî û Demokrasiyê ya Gelan (DEM Parti) ya Êlihê Semra Guneş, di pîrozbahiyê de axivî û cejna welatiyên Êzidî pîroz kir û got: “Bila ev cejn ji bo gelê Êzidî û hemû gelê Kurd pîroz be. Bila Çarşema Sor aştî û edaletê bîne Kurdistanê.”
Piştî vê yekê, welatiyê Êzidî Yusuf Tagay jî xwest ku Cejna Çarşema Sor ji bo gelê Êzidî û hemû gelên cîhanê aştiyê bîne.
Piştî axaftinan, beşdaran bi duayan destbendên ‘Basınbar’ li lepên xwe girêdan. Piştî çalakiyê, welatiyên Êzidî yên li gundê Şasim hatin ziyaretkirin.
