Donald Trump li Oval Ofisê daxuyanî da rojnamevanan û anî ziman ku hebûna leşkerî ya DYE’yê ya li Ewropayê di ber çavan re derbas kiriye û dibe ku hejmara leşkerên xwe yên li Îtalya û Spanyayê dikare kêm bike. Trump got, “Dibe ku ez vê bikim, çima nekim?” û îdîa kir ku van welatan di şerê Îranê de piştgirî nedan Washingtonê.
Trump bi taybetî bal kişand ser Îtalya û Spanyayê û got, “Îtalyayê qet alîkarî bi me re nekir, Spanya jî gelekî metirsîdar tevgeriya.” Serokê Dewletên Yekbûyî yên Emerîkayê îdîa kir ku hevalbendên NATO’yê di operasyonên li dijî Îranê de piştgiriya leşkerî û lojîstîkî nekirin.
RAGEŞIYA BI ELMANYAYÊ RE
Beriya bi rojekê jî Trump eşkere kiribû ku dikare leşkerên DYE’yî yên li Elmanyayê kêm bike. Ev daxuyanî piştî rexneyên Serokwezîrê Elmanyayê Friedrich Merz ên li ser polîtîkayên DYE’yê yên li Îranê hate dayin.
Li gorî daneyên fermî, heta dawiya sala 2025’an li Elmanyayê 36 hezar, li Îtalyayê 12 hezar û 600 û li Spanyayê jî 3 hezar û 800 leşkerên DYE’yî hene.
NERAZÎBÛNA LI NATO’YÊ
Trump di du serdemên serokatiya xwe de timî rexne li NATO’yê kir û îdîa dike ku Ewropa gelekî bi parastina leşkerî ya DYE’yê ve girêdayî ye. Rêveberiya DYE’yê diyar dike ku divê hevalbendên wê hîn bêhtir bi berpirsyariyê rabin.
