Interpolê ragihand ku ew di meha Adarê de li 90 welatan operasyoneke berfireh pêk aniye û derbeyeke mezin li bazirganiya narkotîkê daye.
Operasyon bi navê “Pangea XVIII” hat kirin û nêzîkî 270 kes hatin binçavkirin û 66 torên sûcan hatin têk birin.
Hat ragihandin ku di operasyonê de zêdetirî 6 milyon dermanên sexte an bê ruxset hatin desteserkirin. Hat gotin ku nirxa dermanên desteserkirî bi qasî 15.5 milyon dolarî ye.
Rayedaran diyar kirin ku di nav dermanên desteserkirî de, dermanên zêdekirina ereksiyonê, dermanên aramkirinê, dermanên êşê, antîbiyotîk û dermanên berdana cixareyê hene.
Interpolê hişyarî da ku firotina dermanên sexte li ser înternetê ji bo tenduristiya mirovan xetereyek cidî çêdike.
Di operasyonan de kargeheke narkotîkê ya veşartî li Bulgaristanê hate dîtin. Bi sed hezaran kapsulên antîbiyotîkê li Burkina Faso û tonek îbuprofenê sexte li Perava d’Ivoire hat desteserkirin.
