Fermandariya Giştî ya Hêzên Ewlekariya Hundirîn (Asayîş) Parêzgeha Hesekê bi daxuyaniyekê şehadeta fermandar Serbest Birûsk ragihand.
Di daxuyaniya têkildarî mijarê de hate gotin: “Bi navê Hêzên Ewlekariya Hundirîn (Asayîş), bi serbilindî em şehadeta hevrêyê xwe yê fermandar Serbest Xelîl Cafer ku bi nasnav Serbest Brûsk tê nasîn, radigihînin.”
Daxuyaniyê bi vî rengî dewam kir: “Bi destpêka şoreşê di sala 2011’an de, şehîd Serbest di pêşengiya wan kesan de bû ku dest bi damezirandina Yekîneyên Parastina Gel (YPG) li taxên Helebê, bi taybetî Şêxmeqsûd û Eşrefiyê kir, bi vî awayî bingeha tevgereke berxwedanê danî ku rehên wê di axê û lêgerîna rûmetê de kûr bûn. Şehîd Serbest temsîliyeta zindî ya rêberekî bû ku jiyana xwe ji bo parastina rûmeta gelê xwe bexişand kir. Ew bi dilnizmiya xwe di nav gel û hevalên xwe de dihat nasîn, û ew li her qadê amade bû, bê dudilî erkê xwe pêk dianî, û giyanek pabendbûn û fedakariyê di nav kesên li dora xwe de diçand.
Ew di karê xwe de xîretkêş, di dayîna xwe de dilsoz bû, qet ji berpirsiyariyê dûr neket û li hember zehmetiyan paşve gav navêt. Rihê wî yê welatparêzî ne tenê li qadên şer, lê di jiyana wî ya rojane de jî, heta di nav malbata wî de jî, ku li wir bi prensîbên xwe dijiya û wan wekî teşekî jiyanê bi kar dianî, bû bavê şehîdekî, xwe nîşan dida. Fedakariya wî ya takesî bi fedakariyeke kûr a malbatî ve girêdayî bû, ku biryardariya wî û baweriya wî bi dozê xurt kir. Wî hezkirina gelê xwe qezenc kir û ji ber şehrezayî, dilovanî û nêzîkbûna xwe ya bi gel re wekî yek ji stûnên û rûsipiyên civakê tê dîtin. Ji destpêka şoreşê ve, şehîd Serbest qet ji Helebê derneket. Ji wê gavê û pê ve, ew di hemû şerên Helebê de amade bû. Ew beşdarî her pevçûnê bû û çend caran birîndar bû. Wî di rêvebirina meclîsa Leşkerî ya Helebê de roleke pêşengiyê girt ser xwe, li tenişta fermandarê mezin Ziyad Heleb gav bi gav pêşengtiya şerê parastina rûmeta welatiyên taxê ji hovîtiya çeteyan dikir.”
Di dawiya daxuyaniyê de wiha lê hat zêdekirin: “Di kêliyên herî dijwar ên pevçûnê de, heta kêliya dawî şer kir, rêwîtiya xwe wekî ku jiyaye bi dawî kir; bi israr, wêrek û heta ku gihîşt şehadetê bi doza xwe re dilsoz bû. Wî rêwîtiya xwe bi gotinên ku bûne sembola îradeya wî ya bêdawî kurteber kir; ‘Em ê yan bi rûmet bijîn an jî bi rûmet bimirin, lê em ê ji vir dernakevin.’
Bi vî awayî, hevrê Serbet di berxwedana rûmet û hebûnê de bû sembola fermandarî û welatparêziyê.”
NASNEMEYA ŞEHÎD
Navê Tevgerî: Serbest Birûsk
Nav û Paşnav: Serbest Xelîl Cafer
Navê Dayikê: Cemîle
Navê Bav: Xelîl
Cih û Dîroka Jidayikbûnê: Efrîn, 1971
Cih û Dîroka Şehadetê: Heleb-Şêxmeqsûd, 10.01.2026
