Di rapora NY de, hat diyar kirin ku di encama şerê di navbera Efganîstan û Pakistanê de ya 3 mehên ewil ên salê, herî kêm 372 welatiyên Efganî mirine û 397 sivîl jî birîndar bûne.
Hat ragihandin ku bêhtirî nîvê mirinan ji ber êrîşa hewayî ya artêşa Pakistanê ya li ser Nexweşxaneya Omid a 16’ê Adarê pêk hatiye. Ev nexweşxaneya ku li Kabîlê ye, ji bo dermankirina nexweşên tiryakiyê xizmet dikir.
LI DIJÎ NEXWEŞXANEYA LI KABÎLÊ ÊRÎŞ
Li gorî UNAMA’yê di encama êrîşê de gelek nexweş bûne qurbanî û hat ragihandin ku hin cenaze ji ber şewatên mezin pêk hatine nehatine tespîtkirin.
Li aliyê din rayedarên Pakistanê, îdîakirin ku nexweşane an jî navendên rehabîlîtasyonê nehatine hedef girtin û gotin ku operasyon tenê li dijî ‘hedefên leşkerî û binesaziyên terorê’ hatine kirin.
Hat ragihandin ku şandeya NY li herêma ku êrîş pêk hatî lêkolîn kirine û şopên bombebaranên hewayî tespîtkirine.
LI GORÎ TALÎBANÊ BÊHTIRÎ 400 KES MIRINE
Li aliyê din hikûmeta Talîbanê jî ragihand ku bêhtirî 400 kes mirine. Lê NY ragihand ku, ew bi rengekî serbixwe kariye mirina 269 sivîlan piştrast bike.
Li gorî raporê, di nava qurbaniyan de 13 jin, 46 zarok û 313 jî mêr hene. Hat gotin ku ji ber nexweşxane tenê nexweşên mêr qebûl dikir, ev yek bûye sedem ku hejmara mirina mêran zêde be.
PAKISTAN EFGANÎSTANÊ TEWANBAR KIR
Di salên dawî de aloziyên di navbera Pakistan û Efganistanê de zêde bûne. Pakistan, îdia dike ku komên çekdar ên li Efganistanê li ser axa wê êrîşan dikin.
Wezareta Karûbarên Derve ya Pakistanê, ragihand ku ji destpêka salê ve 130 sivîl û karmendên ewlehiyê di êrîşan de bûne qurbanî. Her wiha ji ber êrîşa xwekujî ya li dijî polîsan jî komên li Efganistanê tawanbarkirin.
TEVÎ AGIRBESTÊ JÎ ÊRÎŞ BERDEWAM KIRIN
Li gorî raporek Neteweyên Yekbûyî, tevî agirbesta ku di dawiya Remezanê de hate ragihandin jî, şer berdewam kirin.
Hat diyar kirin ku, di meha Adarê de xebatkarekî civaka sivîl a Efganî li Nuristanê ji aliyê hêzên Pakistanî ve hate kuştin û tevî kurê wî yê sê salî jî di çem de xeniqî. Neteweyên Yekbûyî, bûyerê wekî “kuştineke hedefgirtî” pênase kir.
LI ÇÎNÊ HEVDÎTIN HATIN KIRIN
Piştî hevdîtinên li Çînê di destpêka Nîsanê de, her du aliyan soz dan ku aloziyan kêm bikin. Lê belê, êrîşên li ser sînor bênavber berdewam kirin.
Li gorî Neteweyên Yekbûyî, di 27’ê Nîsanê de di êrîşên ku zanîngehek li Asadabad nêzîkî sînorê Pakistanê hedef girtin de, gelek sivîl hatin kuştin an jî birîndar bûn.
