Çalakiya ku bi banga Yekîneyên Parastina Jin (YPJ) hatibû amadekirin, ji aliyê Cîgeha Alîna û Pañuelos en Rebeldía ve hat birêxistinkirin. Bername bi parvekirina peyama ku ji aliyê Fermandara Giştî ya YPJ’ê Rojhilat Efrîn ve hatibû şandin, destpê kir. Di peyama Rojhilat Efrîn de ev tişt hate gotin:
“Parastin, mafekî rewa ye ku divê hemû civak û hemû jin xwe birêxistin bikin û bikar bînin; bi rastî jî divê em vê yekê hem di asta civaka xwe de hem jî di asta giştî de rewa bikin û biparêzin. YPJ, mîrateya hemû jinên ku di dirêjahiya dîrokê de rol û zanîna xwe parastine ye. Ew nirxên ku YPJ’ê ji bo hemû jinan, jinên Sûriye, Rojava û cîhanê ava kirine, modelekî nû yê xweparastinê nîşan dide. Ji bo parastina hebûna YPJ’ê divê her kes rabe ser piyan. Ji ber vê yekê em dibêjin ‘Em hemû YPJ ne!’. Banga me ji bo hemû jin, ciwan û civaka me ye: Ji bo parastina vê mîrateyê û vê dîrokê em rabin ser piyan; li hemberî pergala serdestiya baviksalarî di asta herî bilind de têkoşînê bikin û xwe biparêzin.”
Claudia Korol li ser navê Cîgeha Alîna û Femînîstên Abya Yala axivî û rewşa YPJ’ê ya ku di bin gefa tunebûnê de ye, nirxand.
Claudia her wiha êrîşên leşkerî yên dijwar ên li ser Kobanê, Hesekê û Qamişloyê bi bîr xist û diyar kir ku Rêveberiya Xweser a Rojava banga seferberiya giştî kiriye. Wê destnîşan kir ku Rêber Apo tevî ku 27 sal in li girtîgeha girava Îmraliyê di bin tecrîdê de ye, ji bo rêgirtina li kûrkirina komkujiyên li ser gelê xwe, banga berdewamkirina diyaloga aştiyê kiriye.
Claudia di dawiya axaftina xwe de bal kişand ser van xalan: “Em wek jin, femînîst û nepejirênerên nasnameya zayendî yên ji parzemînên cuda, ji bo parastina YPJ’ê, mafê xweparastina jinan û pedagojiya şoreşa Kurd kampanyayê dimeşînin. Di van çalakiyan de em dixwazin ku daxwazên me li hemû cîhanê werin bihîstin: YPJ nayê belavkirin; divê wek yekîneyeke ku jinan û nirxên demokratîk diparêze, di nava artêşa Sûriyeyê de were entegrekirin! Xweparastina jinan û şoreşa Kurd nayê radestkirin.”
Cintia ya ku di çalakiyê de axivî, behsa ezmûna Cîgeha Alînayê ya li Villa Giardinoyê kir. Cîgeh, piştî ku Patricia Gregorini (dêya bijîşka enternasyonalîst Alina Sánchez a ku li Rojavayê jiyana xwe ji dest dabû) beşek ji erdê xaniyê ku keça wê zarokatî û ciwantiya xwe lê derbas kiribû ji Pañuelos en Rebeldía re wek bexşîş da, hat avakirin. Li vir bi rêbaza komunal; ji bo perwerdeya siyasî, pişgiriya femînîst, tenduristiya gel û xebatên xwedîkirinê qadeke kolektîf tê avakirin. Di heman demê de wek navendeke ku lêkolîn û nîqaş li ser ezmûnên şoreşa jinê ya Kurdistanê û pêvajoyên şoreşgerî yên li Abya Yalayê tên kirin, fealiyetê dimeşîne.
Endamekî din ê Cîgeha Alînayê, Bernardo jî anî ziman ku wî Alina ya ku tevlî têkoşîna gelê Kurd bûbû, li Kubayê —di heyama ku Alînayê perwerdeya bijîşkiyê didît de— nas kiriye. Wî diyar kir ku piştre rêyên wan dîsa gihîştine hev û bi vî rengî di navbera ezmûna Kurdistanê û têkoşînên Amerîkaya Latîn de girêdaneke herdemî ava bûye. Gelek kesên ku di çalakiyê de mafê axaftinê girtin, peyamên xwe yên piştgiriya YPJ’ê parve kirin.
Di axaftinan de ev peyam jî hate dayîn: “Hûn ne bi tenê ne.”
Dêya Alînayê, Patricia ya ku beşdarî civînê bûbû jî, careke din piştgirî û rêzgirtina xwe ya ji bo şervanên YPJ’ê û têkoşîna gelê Kurdistanê anî ziman: “Bi rastî jî parastina YPJ’ê erkekî gerdûnî ye; em ê li başûrê cîhanê vê têkoşînê bi bîranîn û piştgiriya Alînayê berdewam bikin.”
