Hevserokatiya Konseya Rêveber a KCK’ê got, “Dayika me Bahar Bîlge hemû feryat, zehmetî û serhildana gelekî ku di qirkirinan re derbas bûye tevlî temenê xwe yê 87 salî kir, bi berdêlên mezin li ser piyan maye, mejiyê xwe û dilê xwe yê mezin bi tiştên qewimîne bedew kiriye û ji bo doza rewa ya gelê xwe bimeşîne kêliyekê jî teredut nekir. Me di 10’ê Tîrmehê de dayika xwe ji dest da.”
Di daxuyaniya Hevserokatiya Konseya Rêveber a KCK’ê de ev tişt hatin diyarkirin:
“Dayika Bahar dizanî ku em xwedî rastiya gelekî welê ne ku hebûna wê tune hatiye hesibandin û ji bo bibe xwe ji dervey têkoşînê ti rêyên din jê re nebû. Dayika Bahar her kêliya jiyana xwe li gorî vê şêwe dayê, di vê oxirê de ji dayîna ti berdêlan xwe nedaye paş. Di sala 94’an de bû şahida şehadeta hevalê jiyana xwe, ev yek nebû sedem ku ew paşde gav bavêje û weke kesek bi rûmet û dilsozê xak, çand û zimanê xwe erdema jiyankirinê derbasî du kurên xwe jî kir û li pey wê jî du neviyên xwe kir neferê vê doza bi maf û şehadeta wan dît. Ji ber ku dil dabû doza azadiyê zext, êşkence û zilm ji jiyana wê ti carî kêm nebûye, lê li dijî van hemûyan weke dayikek Kurdistanê ya serbilind hemû berpirsyariya xwe bi cih anî, bersiv da û tevî hemû zehmetiyan û temenê xwe yê mezin timî di nava têkoşînê de bû. Ji serhildanan destpê kir û di her qonaxa têkoşîna azadiyê de, bi roleke aktîf rabûye. Herî dawî di înîsiyatîfa Dayikên Aştiyê de ku demek dirêj bi hewldaneke mezin di nav de cih digirt, bêyî hincet heta nefesa xwe ya dawî li herî pêş têkoşîna xwe dewam kiriye. Di vî warî de dayika Bahar dayika hemû zarokên Kurdistanê û milîtanên azadiyê bû. Xwe bi têkoşîna azadiyê re kir yek û bûye temsîla têkoşînê. Dayika Bahar bûye dengê serhildanê yê hemû jinên ku êş kişandine û dengê wan di kûrahiya dîrokê de hatiye hepskirin. Bûye îspata wê yekê ku jin tenê bi têkoşînê dikarin xwe ava bikin. Hemû jiyana dayika Bahar di nava têkoşînê de derbas bû, bêyî teredut tevlî pêvajoya aştî û civaka demokratîk a ji aliyê Rêbertiya me ve hatî destpêkirin, bû. Bi dilsoziya xwe ya bi Rêbertî û şehîdan re ji bo mayîndebûna aştiya demokratîk, hebûna me û destkeftiyên me têkoşîneke aktîf raber kiriye. Dayika Bahar guh neda nexweşiyên xwe û bedena xwe ya westiyayî, heta bêhna xwe ya dawî têkoşîna xwe domand û jiyana xwe ji dest da. Ji ber vê yekê, ew bû şehîda pêvajoya aştî û civaka demokratîk.
Em serbilind in ku zarokên dayikek wiha ne. Di serî de malbata me ya welatparêz a hêja, em ji hevrêyên dayika Bahar Dayikên Aştiyê, gelê xwe û hemû jinan re sersaxiyê dixwazin. Em dayika xwe Bahar bi rêzdarî, minet û hezkirin bi bîr tînin. Weke zarokên dayikek wiha em soza xwe dubare dikin ku bi berxwedan û biryardarî xeyalên wê pêk bînin.”
