Bi amadebûna beşek ji kesên ku ji destê DAIŞ’ê rizgar bûne, her wiha çalakvan û rojnamevanên Êzidî, daxuyaniyek hate dayîn. Di daxuyaniyê de bang hat kirin ku di 12’emîn salvegera fermanê de, hemû alî, rêxistin û xelkê Şengalê bi hev re çalakiyekê bi bandor lidarbixin û ji bo partî, eşîr an malbatên xwe, çalakiyên cuda li cihên cuda çênekin.
Sifiyan Şengalî ku di dema fermanê de ji nava gorên bi kom rizgar bûye, di daxuyaniyê de ev got: “Em bang li hemû civaka xwe û her aliyan dikin ku beşdarî çalakiya bîranîna şehîdên fermanê bibin. Me Bîrdariya Şehîdên Fermanê ya li gundê Solaxê wekî cihê herî guncav diyar kir. Em daxwaz dikin ku di wê rojê de her kes berê xwe bide wir û li wê derê tevlî bîranînê bibe.”
Her wiha di daxuyaniyê de bang li her kesê ku dixwaze di komîteya amadekar de cih bigire hat kirin ku roja 14’ê Tîrmehê, saet 15:00’an li Bîrdariya Şehîdan a li Solaxê amade bin, da ku amadekariyên çalakiyê werin kirin.
