Endamê Konseya Demokratîk a Kurd a Fransayê (CDK-F) Îmam Namoglu yê ku di 4’ê Tîrmehê de ji ber qeyrana dil li Parîsê jiyana xwe ji dest da, li gundê Zelxider ê navçeya Depê ya Xarpêtê hate veşartin.
Ji bo Namoglu ewilî li Parîsê sersaxî hat qebûlkirin. Piştre di 11’ê Tîrmehê de li Villiers-le-Bel a Parîsê merasîma xatixwestinê hat lidarxistin. Di merasîma ku malbat, xizm û hevalên wî yê têkoşînê beşdar bûn, darbesta Namoglu li ser milên hevalên wî anîn holê. Di axaftinên merasîmê de hatin kirin de kesayet, jiyan û tevkariya Namoglu ya di têkoşîna azadiya Kurd de hatin vegotin. Piştî merasîmê cenazeyê Namoglu ji bo veşartinê şandin Kurdistanê.
Piştî merasîma li Parîsê, cenazeyê Namoglu şandin bajarê ku lê ji dayik bûye. Cenazeyê Namoglu ji hêla malbat û hezkiriyên wî ve li gundê Zelxiderê hat pêşwazîkirin. Piştre Namoglu li goristana gund hat veşartin.
Îmam Namoglu di destpêka salên 1980’an de ji ber sedemên siyasî koçî paytexta Fransa Parîsê kir, heta dawiya jiyana xwe xebatên siyasî meşand. Namoglu salên dirêj li Parîsê ji bo parastina naanema û rêxistinkirina civaka Kurd kedek mezin da û di têkoşîna maf û azadiya gelê Kurd de rolek çalak lîst.
Namoglu di avakirina komeleyên Kurd ên li Parîsê û rêxistinkirina CDK-F’ê de tevkariyeke mezin kir û di nav civaka Kurd de pir dihat hezkirin. Hezkiriyên wî diyar kirin ku mîrate û jiyana Namoglu di têkoşîna azadiya Kurdan de bûye xeteke mînak a têkoşînê.
