Komeleya Hiqûqnasan ji bo Azadiyê (OHD) û Federasyona Komeleyên Hiqûqî û Piştevaniyê ya Malbatên Girtî û Hukumdaran a MEDê (MED TUHAD-FED) rapora 6 mehan a bi sernavê “Binpêkirinên mafên mirovan li lirtîgehên Tirkiyeyê ya Çile-Hezîrana 2026’an” ragihand.
Di daxuyaniya ku li avahiya MED TUHAD FED’ê hat dayin de binpêkirinên li 112 girtîgehên cuda yên Tirkiyeyê hatine komkirin. Hevseroka Med Tuhad Fedê Yeter Erel beriya daxuyaniyê axivî û got: “Em ê hertim li hemberî astengiyan bisekinin.”
Piştre endamê Navenda Giştî ya OHD’ê Şemdîn Şahîn metna daxuyaniyê xwend. Şemdîn Şahîn destnîşan kir ku binpêkirina mafên mirovan a li girtîgehan êdî ne bûyerên yekane ne, veguherîne krîzeke sîstematîk, avahîsazî û kûr e û wiha axivî: “Rejîma înfazê ya girankirî ku bi Girtîgeha Girava Îmraliyê re derket holê û bi girtîgehên ewlehiya bilind hat berfirehkirin, tecrîdeke giran a fîzîkî û derûnî diafirîne.”
Şahîn balê kişand li ser biryara DMME’yê ya sala 2013’an û girîngiya nasîna mafê hêviyê tîne ziman. Şemdîn Şahîn anî ziman ku astengkirina mafê gihîştina tenduristiyê, sewqên dereng, muayeneya bikelepçe û raporên ATK’ê yên nezanistî rê li ber binpêkirina kirina mafê jiyanê ên girtiyên nexweş vedike û axaftina xwe wiha berdewam kir: “Ji aliyê dîn ve Lijneya Îdare û Çavdêriyê mîna darazekî paralel dixebitin û bi hincetên pûç mîna nediyar kirina poşmaniyê rê li ber berdana girtiyên ku dema wan qediyaye digirin. Girtiyên ji Rojava û Rojhilat di statuya bêwelat de ne û ji mafên bingehîn ên mîna parêzer û hevdîtina malbatê bêpar têne hiştin. Rejîma infazê ya zilamparêz zextên zayendî û siyasî li ser jinan zêde kiriye û mafên wan ên paqijî, tenduristî û dîtina zarokên wan asteng dike. Di heman demê de astengkirin û neşandina name, pirtûk û rojnameyên Kurdî û muxalîf binpêkirina aşkere ya qedexeya cihêkariyê û azadiya ragihandinê ye.”
Şahîn bal kişand ser banga Rêber Apo ya di 27’ê Sibata 2025’an de ya Aştî û Civaka Demokratîk û anî ziman ku tevî vê bangê jî di rewşa girtîgehan de başbûnek çênebûye û wiha dawî bi dawî kir: “Saziyan teqez kir ku ji bo paşerojeke aştiyane pêngava yekem divê ji girtîgehan bê avêtin, dawî li tecrîdê bê anîn û gavên qanûnî yên guncav bi lezgînî werin avêtin.”
