Li gorî daneyên Ofîsa Koordînasyona Karên Mirovî ya Neteweyên Yekbûyî (OCHA), di şeş mehên ewil ên sala 2026’an de li Ûkraynayê 1,396 sivîlan jiyana xwe ji dest dane û 7,978 kes jî birîndar bûne. NY’ê diyar kir ku ev yek li gerî heman serdemên salên 2024 û 2025’an bi awayekî eşkere zêde bûye.
Serokê Mîsyona Çavdêriya Mafên Mirovan a Ûkraynayê ya NY’ê Danielle Bell got ku bikaranîna moşekên balîstîk û çekên menzîldirêj ên li ser herêmên ku nifûsa wan zêde ye bûye sedem ku zêdetir welatiyên sivîl jiyana xwe ji dest bidin û xanî û binesaziya sivîl zirareke mezintir bibînin.
Koordînatorê Alîkariya Mirovî ya Ûkraynayê ya NY’ê Matthias Scmale jî anî ziman ku li gel berdewamkirina êrîşan malbatên nû xizmên xwe winda kirine, ji cih û warên xwe bûne û neçar dimînin ku jiyana xwe ji nû ve ava bikin.
ÊRÎŞÊN MOŞEK Û IHA’YAN ÊN BERAMBER
Her wiha Hêzên Hewayî yên Ûkraynayê ragihand ku Rûsyayê tevahiya şevê 101 balafirên bêmirov ên cure Şahed û du keştîsavarên cure Oniks û di moşekên antîradar ên cure H-31P avêtine.
Rêveberiya Kievê da zanîn ku ji van 66 IHA ji aliyê pargalên parastina hewayî hatine xistin yan jî bêbandorkirin, 29 IHA û moşekeke Oniks 18 xalên cuda hedef girtine.
Wezareta Parastinê ya Rûsyayê jî di heman demê de ragihand ku pergala wan a parastina hewayî 605 balafirên bêmirov ên aîdî Ûkraynayê îmha kirine.
Moskovayê da zanîn ku IHA li ser herêmên weke Belgorod, Kursk, Bryansk, Voronej, Kaluga, Lipetsk, Rostov, Moskovayê, Kirim, Azak û Behra Reş hatine xistin.
Her wiha rayedarên Rûsî diyar kirin ku IHA’yên aîdî Ûkraynayê li herêma Tverê navendeke lojîstîkê ya aîdî şîrketa bazirganiya online ya bi navê Wildberries hedef girtine û li tesîsa berbehs zirarên biçûk çêbûne.
