Tevî daxuyaniyên Trump jî Koreya Başûr, ragihand ku tetbîqata leşkerî ya 11 rojî ya bi navê “Ulchi Freedom Shield” roja Duşemê dest pê kiriye. 18 hezar leşkerên Koreya Başûr û 28 hezar û 500 hêzên DYE’yê yên li herêmê tevlî tetbîqatê dibin. Trump, li ser medyaya civakî diyar kir ku ev tatbîqat pir biha ne û got ku peyamek şaş didin Koreya Bakur.
Di tetbîqatan de ezmûn û tecrûbeyên ku leşkerên Koreya Bakur di şerê Ûkraynayê de bi dest xistine dê berçav bêne girtin. Di tetbîqatan de dê bi taybetî li dijî êrîşên dronan, gefên sîber û tevlîhevkirina sînyalên GPS’ê amadekarî bên kirin.
Serokdewletê Ûkranyayê Volodimir Zelenskiy, îdîa kiribû ku Koreya Bakur amadekariyê dike ku bi deh hezaran leşkerên din bişîne ji bo piştgiriya Rûsyayê.
Serokê Koreya Başûr Lee Jae Myung ji dema ku hatiye ser kar vir ve dixwaze bi Koreya Bakur re diyalogê deyne, lê heta niha tu bersiv negirtiye.
Trump peywendiyên xwe yên dostane yên berê yên bi Kim Jong Un re bi bîr xist û diyar kir ku ew pir baş li hev dikin. Koreya Bakur jî tetbîqatan wekî provaya dagirkeriyê dibîne û hişyarî dide ku dê gavên astengker bavêje û ceribandinên xwe yên fuzeyan berdewam dike.
Tevî vê yekê, Koreya Başûr hêvî dike ku ev peywendiya kesane ya di navbera herdu serokan de bibe sedema destpêkirina diyalogek nû.
