Duh di çarçoveya xebatên ji nû ve avakirinê yên ku li Şengalê pêş dikevin de, Yekitiya Ragihandina Êzidxanê bi beşdariya 50 delegeyan û nûnerên TAJÊ, Meclisa Gel, nûnerên şaredariyan, Komîteya Dîplomasiyê, Jineolojî, Ragihandina Asayîşê, YBŞ û YJŞ’ê û Ragihandina Azad a Jinên Êzidî, li Geliyê Kersê yê Şengalê bi dirûşmeya ‘Yên ku armanca wan mezine, hewldanên wan jî mezinin’ 1’emîn Konferansa xwe lidar xist. Îro jî encamnameya konferansê bi raya giştî re hate parvekirin.
Encamnameya 1. Konferansa Yekitiya Ragihandina Êzidxanê wiha ye:
“Me 1. Konferansa xwe ya Yekîtiya Ragihandina Êzidxanê di 12’yê Tebaxê de bi dirûşmeya; ‘Yên ku armanca wan mezin e, hewldanên wan jî mezin e’ bi tevlîbûna 50 delege û mêvanên ji saziyên Meclîsa Gel a Şengalê û TAJÊ lidar xist. Konferansa me ya rojekî ajot, diyarî Rêber Apo, hemû şehîdên ragihandina azad û şehîdên fermana 3’yê Tebaxê hate kirin. Hemû endamên ragihandina azad a Şengalê ku ji bo xurtkirin û mezinkirina xebatên propaganda-ajîtasyonê li hev kombûn, bi nîqaş û pêşniyarên xwe amadekariya xwe ya ji bo mezinkirina xebatên ragihandinê vegotin.
Di nava civaka me de meha Tebaxê xwedî gelek wateyên dîrokî ye. Mehek wisa ye ku ferman, komkujî, reşkujî li dijî me hatiye pêkanîn. Armanca me ji lidar xistina konferansê di vê mehê de ew bû ku girêdana xwe bi şehîd, doz, bîr û baweriya xwe ve bidin nişandan. Bi vê rêyê ragihînin ku êdî civaka me ji her alî ve bûye xwedî zanist û dengê xwe gihandiye tevahî cihanê.
Ragihandina me ya azad a li Şengalê temenê wê digihije 15 salan, lê bi fermanê û pêvajoya rizgarkirina Şengalê re bi sazîbû, xwedî mîrateyeke dewlemend a madî û manewî ye. Şehîd Ferhad Qîranî, Ferhad Cuva, Agir Bane, Nûjiyan Erhan, Rizgar Denîz û herî dawî kedkarê ragihandina azad Mirad Mîrza bigire heya gelek şehîdên ragihandina azad ku dem bi dem hatine Şengalê û ked dane, nirxeke mezin li pey xwe hiştine. Ew tovê ku beriya 15 salan li Şengalê hatiye avêtin, ezmûneke girîng ji me re hiştiye. Bi dehan ciwanên Êzidî li ser şopa şehîdan perwerde bûn. Dema ragihandina azad li Şengalê çandeke ragihandinê pêş xist, tu ragihandinek din nebû, lê li welat û derveyî welat ragihandineke ku xizmetê ji civaka Êzidî re dikir, bû nimûne ji bo pêşketina gelek dezgehên ragihandinê ku bibin dengê civaka me. Ji ber vêya ragihandina me bi kovar, radyo, karên nivîskî, dîtbarî û herî dawî jî dîjîtal her çûye xwe li her qadekî şax daye. Mezinbûna ragihandina me li Şengalê ji bo rojnamevan û ragihandinên din yên li herêmê kar dikin jî rola dibistanekî lîstiye û hîn jî vê rola xwe bi layiqî dilîze.
Di encama xebatên me yên propaganda-ajîtasyonê ya ragihandina azad de di vegera bihezaran kesî ji bo Şengalê, kewandina birînên fermanê, careke din vejandina çand û baweriya Ezidayetiyê li ser vê axê, ji nûve avakirina herêmê, parastin û geşkirina xwezaya Şengalê de, rêxistinkirina civakê û gihandina fikra xweparastinê de, bi îradekirina jin û ciwanan di rêveberina Şengalê de roleke diyar lîstiye. Bi taybet di xirakirina peyman û pîlanên dijî îradeya civaka Êzidî de, li dijî zêhniyeta nîfaq û nefretê navbera gel û baweriyan de pêşbixe hest û fikrê pêkvejiyanê li Şengalê zindîkirinê de, di pêşxistina girîngiya yekîtiya demokratîk a Êzidan de roleke erênî a bi bandor lîstiye. Li gel nirxandina van aliyên erênî, ji bo aliyên ku ragihandina azad kêm maye jî nirxandinên girîng hatine kirin, rexneya wê hatiye kirin û rexnedayîna wê jî hatiye dayîn. Bi taybet di mijara pêşîlêgirtina bûyerên civakî, zêhniyeta paşverû û kevneperest de, di pêşî lê girtina kuştin û xwekuştinên jin û ciwanan de, zext û tundiya nav malê ya dijî jin de tevî xwedî perspektîfeke xurt a weşanê ye jî, hîn nekariye bersiveke xurt a têrker bide.
Ji bo ragihandina me bibe dengê azad ê gelê xwe, xwe li gorî pêwîstiyên civaka xwe, xwe rêxistin bike, di warê meslekî de jî xwe nû bike, me pêwîst dît xebatên xwe yên Şengalê ku gihîştiye qonaxeke girîng derbasê asteke hîn pêşdetir bikin. Rêber Apo ku bi pêvajoya entegrasyona demokratîk ji me re got, ‘Yên xwe neguherin û nûjen nekin, wê li paş de bimînin’ ji bo me bûye hem hişyarî hem jî perspektîfeke sereke. Ji bo em li gorî rihê demê û pêwîstiyên gelê xwe, xwe rêxistin bikin, me pêwîst dît ku yekemîn konferansa xwe ya ragihandinê ya Şengalê li dar bixin. Hêvî dikin ev konferans bibe boneya destpêkeke nû ji bo hemû gelê me û hem pîşeyên me yên li Şengalê. Ya dikeve ser milê ragihandina me xwe zêdetir rêxistin kirin, şax dayîn û berfirehkirina li gorî pêwîstiyane.
Di konferansê de me rêveberiya xwe ya nû bi şêwazeke herî demokratîk hilbijart û berpirsyariyê da ser milê meclîsa ragihandinê. Wê Meclîsa me di ber rêvebirin, pêşxistin û mezinkirina xebatên ragihandina azad de berpirsyar be.
Ji bo em bikarin ji hemû daxwazên civaka xwe, azadîxwazan û bi taybet jî jinên Êzidî re bibin bersiv, ji bo avakirina civakeke demokratîk, azadîxwaz, wekhev, jîngehparêz wê giraniyê bide ser xebatên perwerdehiya akademîk. Bi van perweredehiyên akademîk rola zanîngehek bilîze. Her ciwanek me ya di van perwerdeyan re derbas bibin, wê di ronîkirin û avakirina civakeke demokratîk de roleke berçav bilîze. Ji bo vêya xebatên akademiya Şehîd Agir Bane, perwerdeyên fikrî û meslekî yên di çarçoveya branşan de dê weke yek ji xebata me ya stratejîk a demê be.
Ji bo ragihandina me ya azad bikare van hedefên xwe pêk bîne jî pêwîstî hate dîtin, zêdetir girîngiyê bide karên hevpar ên bi rihê komîn. Hem pêşxistina rih û fikrê xwebexş û komîn di nava her endameke ragihandina azad de, hem jî ji bo ev rih di nava hemû dezgehên ragihandinê yên Şengalê de û hempîşeyên me de jî pêş bikeve, wê girîngiyeke zêdetir bide xebatên hevpar û xurtkirina peywendiyên li gel wan. Ji bo vêya jî pêwîstî bi xurtkirin û bisazîkirina xebatên peywendiyan.
Ji bo hemû dezgehên ragihandinê yên Şengalê bikarin bibin dengê rasteqîn ê gelê xwe, pêwîstî bi hevparkirina rojevan û zimaneke ne qewmiyetperest, olperest, cinsiyetparêz û her weke din heye. Lewma weke hedefekî datîne pêş xwe, ji bo di platform û şêwir, konferansên hevpar de werin ba hev. Ji bo vêya jî erka pêşengiyê dide xwe û wê di dema nû ya xebatê de weke xebateke girîng dest bigire.
Em ê li gel zêdekirin û mezinkirina hejmara endamên xwe, girîngiyê bidin her cûre xebatên bikevin xizmeta civaka me. Lewma emê hem di warê meslekî, hem fikrî û hem jî şêwazê karkirina komîn de bibin nimûne û berdewam bin di avêtina gavên destpêkê de.
Em konferansa xwe li hemû endam û kedkarên ragihandina azad, hemû ragihandkar û rojnamevanên Şengalê yên weşangeriyeke biexlaq û di berjewendiya gelê xwe de dikin, pîroz dikin, ji bo xebatên hevpar ên di xizmeta civaka xwe de banga xebatên hevpar dikin.
Dûbare konferansa xwe li Rêber Apo, li Şehîdan, li civaka Êzidî û hemû hem pîşeyên xwe pîroz dikin. Em careke dibêjin; Yên armancên wan mezine, hewldanên wan jî mezine.’’
