Xizmên windayan û Şaxa Komeleya Mafên Mirovan(ÎHD) a Amedê çalakiya xwe ya “Bila winda bên dîtin kujer bên darizandin“ di hefteya 916’emîn de li ber Bîrdariya Mafê Jiyanê ya Parka Koşûyolû ya navçeya Rezan a Amedê li dar xist. Hevserokê ÎHD’ê ya Şaxa Amedê Ercan Yilmaz, parazvanên mafên mirovan, endam û rêveberên saziyên sivîl ên civakî û xizmên windayan tevlî çalakiyê bûn. Di çalakiyê de wêneyên kesên hatine windakirin hatin hilgirtin. ÎHD’ê û xizmên windayan di çalakiya vê hefteyê de aqûbeta Osman Buluttekîn ê ku di 23’ê Tebaxa 1995’an de li navçeya Pasûrê ya Amedê ji aliyê kesên ku xwe wek polîs dane nasîn ve ji mala wî bi zorê derdixin û dibin û ji wê rojê ve hê jî aqûbeta wî nayê zanîn, pirsîn.
Çîroka Osman Buluttekîn ji aliyê endama ÎHD’ê parêzer Berfîn Elçî ve hate xwendin.
Daxuyanî piştî deqeyek çalakiya rûniştandinê bi dawî bû.
ÊLIH
Xizmên Windayan û Şaxa ÎHD’ê ya Êlihê jî ji bo ku aqûbeta windayan were zelalalkirin û bi daxwaza darizandina kujeran, di hefteya 752’yemîn de çalakiya xwe li ber Abîdeya Mafên Mirovan a li Cadeya Gulistanê li dar xist. Di çalakiyê de aqûbeta Mehmet Emîn Çelîk ê ku di 28’ê Tebaxa 1994’an de li Taxa Yenî ya girêdayî navçeya Hezo ya Êlihê hat kuştin, pirsîn.
Çîroka Mehmet Emîn Çelîk ji aliyê endamê rêvebir Huseyîn Elçî ve hat xwendin.
RIHA
Şaxa Komeleya Mafên Mirovan (ÎHD) a Rihayê û xizmên windayan di hefteya 82’yan de çalakiya xwe ya bi daxwaza “Bila winda bên dîtin, faîl werin darizandin” li dar dixin, domandin. Xizmên windayan û parêzvanên mafên mirovan li Parqa Novadayê ya Navçeya Xelîliyê ya Rihayê kom bûn. Di çalakiyê de pankarta ji wêneyên windayan hatiye çêkirin û wêneyên windakiriyan hatin hilgirtin. ÎHD’ê di çalakiya xwe ya vê hefteyê de aqûbeta Faysal Kizilirmak ê ku di sala 1992’yan de dema diçû ser kar di encama êrîşeke çekdarî de jiyana xwe ji dest dabû, hate pirsîn. Endamên saziyên sivîl û gelek xizmên windayan beşdarî çalakiyê bûn.
Çîroka windakirina Faysal Kizilirmak ji hêla Rêveberê Şaxa ÎHD’ê ya Rihayê Mehmet Kilinç ve hat xwendin.
Daxuyanî piştî deqeyek çalakiya rûniştandinê bi dawî bû.
COLEMÊRG
Çalakiya Şaxa Komelaya Mafên Mirovan (ÎHD) a Colemêrgê û xizmên windayan a “Bila winda bên dîtin, kujer bên darizandin” li kolana Hunerê ya Geverê hat lidarxistin. Di hefteya 242’yemîn a çalakiyê de kujerên Mehmet Ertak yê ku 18’ê tebaxa sala 1992’yan de li Şirnexê hatibû windakirin hat pirsîn.
Metna daxuyaniyê ji aliyê sekreteterê ÎHD’ê yê Colemergê Pinar Şen ve hat xwendin û hat ragihandin ku ev 34 sal e kujerên Mehmet Ertak nehatine dîtin û nehatine darizandin. Di dawiya daxuyaniyê de pirsa “Winda diyar e, kujer li ku ne?” hat pirsîn.
Daxuyanî bi çalakiya rûniştandinê bi dawî bû.
ÎZMÎR
Komîsyona Windayan a Şaxa Îzmîrê ya Komeleya Mafên Mirovan (ÎHD), di çalakiya vê hefteyê de ya ku du hefteyan carekê li ber Sumerbanka Kevn a Konakê pêk tîne, bi boneya 30’ê Tebaxê Roja Windakirina bi Zorê ya Navneteweyî daxuyaniyek da. Di daxuyaniyê de pankartên ‘Windayî diyar in, kujer li ku ne?’ û ‘Winda wijdana te ne, xwedî li wijdana xwe derkeve’ hatin vekirin. Daxuyanî ji aliyê Endama Komîsyona Windayan a ÎHD’ê Vetha Aydin ve hat xwendin.
Vetha Aydin destnîşan kir ku bûyerên windakirina bi zorê yên ku bi taybetî di salên 1990’î de qewimîn, hê jî nehatine ronîkirin û polîtîkaya bêcezahiştinê didome û wiha got: “Lêgerîna me ya edaletê û heqîqetê li gelek bajaran, bi taybetî ji aliyê Dayikên/Mirovên Şemiyê ve li ber Lîseya Galatasarayê tê meşandin, bi biryarî berdewam dike. Bêyî rûbirûbûna bi rabirdûyê re û bêyî darizandina berpirsan avakirina aştiyeke civakî ya mayinde ne pêkan e; divê dewlet dosyayên windayan û gorên komî bi rêbazên zanistî lêkolîn bike.”
Vetha Aydin bang li dewleta Tirkiyeyê kir ku Peymana Neteweyên Yekbûyî ya li Dijî Windakirina Bi Zorê îmze bike û windakirina bi zorê di nava pîvanên navneteweyî de wekî sûcekî serbixwe binirxîne û ev tişt vegot: “Em ê heta ku çarenûsa hemû windayan bê eşkerekirin, heqîqet derkeve holê, berpirs bên darizandin û bêcezahiştin bi dawî bibe, têkoşîna xwe bidomînin.”
