Di jiyana Beyan Ferec de 1’ê Çileya 2000’î bû demeke diyarker. Wê rojê hevjînê wê Bekir Abdulkerim Abdullah ji bo biçe dikanek li Helebceyê ji malê derket. Li gorî gotinên Beyan, Bekir beriya ku ji malê derkeve qala televîzyona xerabûyî ya mirovekî extiyar û xizan kir. Got, wê televîzyoneke nû bide wî ku bêyî televîzyonê dest bi sala nû neke.
Piştî bi 10 deqeyan dengê teqîna ji dikanê hat jiyana Beyan Ferec guhert.
Beyan Ferec li gel xesû û kesên din ên li malê çûn dikanê û dîtin ku dikan bi temamî xera bûye. Li gorî gotinên Beyan, teqemeniya li hundirê televîzyonê hatibû bicihkirin teqiya bû. Di encamê de Bekir li cihê bûyerê şehîd bûbû. Beyan wê demê hîn 27 salî bû.
ZEWACA DI 16 SALÎ DE
Beyan ku sala 1974’an li taxa Necîbek a Silêmaniyeyê ji dayik bû anî ziman ku ji ber karên siyasî yên malbata wê ji aliyê rejîma Baasê ve dihate şopandin, lewma di zarokatiya xwe de nekarî perwerdeyê dewam bike.
Beyan heta pola şeşemîn xwend û di 16 saliya xwe de bi zora bavê xwe hate zewicandin.
Beyan Ferec ku di sala 1990’î de bi kurê metka xwe Bekir re zewicî 2 keç, 2 xort bi giştî çar zarok anî dinyayê.
Malbat demekê li Derbendîxanê ma. Beyan di salên 1990’î de ji ber şerê li ser sînor ê Germiyan û Serazorê û ji ber koçberiyê neçar ma ku jinûve li Silêmaniyeyê vegere.
Bekir endezyarê elektrîkê bû, lê belê nekarî pîşeyê xwe bi rengekî fermî bike. Li taxa Necîbekê ya li Silêmaniyeyê dikaneke tamîrê xebitand.
Li gorî gotinên Beyan Ferec guherîna di jiyana Bekir de, piştî ku hin kesên hatin dikanê nas kir, destpê kir. Beyan Ferec anî ziman ku şêweyê axaftinê û nêzîkatiyê yên van kesan bandor li wî kir. Hevjînê wê jê re got, ku van kesan piştî demekê gotin têkiliya wan bi PKK’ê re heye.
Beyan Ferec ragihand ku Bekir piştre bi PKK’yiyan re dest bi kar kir û mala wan bi demê re bû cihekî kombûna li hev a van kesan. Beyan Ferec diyar kir ku bala Bekir li ser karên civakî û siyasî bû û hevjînê wê ji bo gelê xwe dest bi xizmetê kir.
LI GEL ZEXTÊ JÎ LI GEL HEVJÎNÊ XWE SEKINÎ
Beyan Ferec anî ziman ku di sala 1994’an de hevjînê wê Bekir derbasî Helebceyê bû, li vê derê beşdarî nava karên çapemeniyê bû û ji ber karên xwe yên çapemeniyê ji aliyê YNK’ê ve gelek caran hate binçavkirin û girtin.
Beyan Ferec dibêje di vê demê de ji derdora xwe zextê dibîne. Beyan qala wan hişyariyan dike ku jê re dihate gotin, “Eger hûn bi PKK’yiyan re di nava têkiliyê de bin wê malbat û zarokên we zerarê bibîne” û tîne ziman ku hevjînê wê li gel vê yekê nesekinî.
Nûçeya teqînê ya 1’ê Çileya 2000’î jiyana malbata wan bi rengekî ku veger jê nebe guhert.
PIŞTÎ ŞEHADETA HEVJÎNÊ WÊ
Yek ji pirsgirêkên herî mezin ên ku piştî şehadeta Bekir, Beyan lê rast hat, helwesta malbata hevjînê wê li ser zarokên wê bû.
Beyan Ferec diyar kir ku malbata Bekir xwest zarokan jê bistîne û wê ji malê derxîne. Jê re hate gotin, divê ew ya bi yekî ji malbatê bizewice yan jî malê biterikîne.
Beyan Ferec anî ziman ku di vê demê de piştgiriya herî mezin ji dayika xwe wergirt û dayika wê jê re got, “Ez ê nehêlim ku jineke dayika çar zarokan bê binpêkirin.”
Beyan got, piştî şehadeta hevjînê xwe bi qasî pênc salan nezanî wê jiyana xwe çawa jinûve ava bike. Piştre jî dest bi kar kir û bi demê re mal û wesayitek ji xwe re kirî.
Ji çar zarokên xwe 3 ji wan zewicand. Zarokek wê jî hîn li gel wê ye.
JIYANA XWE JINÛVE AVA KIR
Beyan Ferec diyar kir ku piştî şehadeta hevjînê wê demekê ji karên siyasî û civakî qut bû, di sala 2004’an de jî beşdarî nava karên Partiya Çareseriya Demokratîk a Kurdistanê (PÇDK) bû.
Ji aliyekî ve da ser şopa hevjînê xw,e li aliyê din jî ji bo karibe zarokên xwe mezin bike û ji aliyê aborî ve bi serê xwe be dest bi kar kir, karê xwe ava kir.
Nêzî 17 sal in jî karê çandina şitilan dike.
Beşeke mezin a roja xwe li şitilgehê derbas dike. Dixebite, derdorê sererast dike û bi şitlan mijûl dibe.
Ji bo Beyan Ferec çandina şitilan ne tenê karekî ji bo debarê ye. Beşeke girîng a jiyanê ye ku piştî şehadeta hevjînê xwe bi derfetên xwe jinûve ava kir.
Dibêje, “Bêyî dikanê îdare nakim.”
Dibêje, zarokên wê êdî jiyana xwe ava kirine, ew jî xwedî wê hêzê ye ku karibe karê xwe dewam bike.
‘DIVÊ JIN KARIBE JIYANA XWE BI XWE AVA BIKE’
Nêrînên Beyan Ferec ên têkildarî jinan xwe dispêre tecrûbeya wê ya jiyanê.
Beyan Ferec anî ziman ku di nava civaka Kurd de piraniya jinên ku hevjînên wan wefat dike, malbat û xizmên wan hewl didin jiyana wan diyar bike û destnîşan kir ku divê jin şert û mercan ava bikin ku jiyana li ser bimeşîne.
Di vê çarçoveyê de bal kişand ser girîngiya serxwebûna civakî û aborî ya jinan û got, “Divê jin bêyî ku hewcedarê bav, kek an jî hevjînê xwe be karibe jiyana xwe bi xwe ava bike.”
‘DIVÊ HER JIN KARIBE LI SER LINGÊN XWE BISEKINE’
Beyan Ferec nêzî 17 sal in şitilan diçîne û dibêje ku wê ji niha û pê ve jî kar bike.
Vê bangê li jinan dike: “Divê her jin karibe jiyana xwe bi rêxistin bike û li ser lingên xwe bisekine.”
Çîroka jinekê ku di 16 salî de hate zewicandin, di 27 salî de bi çar zarokên xwe bi tenê ma, piştî şehadeta hevjînê xwe derdora wê hewl da li ser jiyana wê û zarokên wê biryarê bide, lê ew li ser linê xwe sekinî û karê xwe dike.
Di jiyana Beyan Ferec de gelek tişt guherîn.
Lê belê tenê fikrek neguherî.
Hîn jî wê gotinê dibêje:
“Divê jin jiyana xwe bi xwe diyar bike û bimeşîne.”
