Bi hatina Wezîrê Dadê Akin Gurlek a nîqaşên budçeyê ya li komîsyonê re protesto destpê kirin. Parlamenterên Partiya Nû destê Gurlek negirtin û wî protesto kirin. Parlamenterên DEM Partiyê jî pankartên ku wêneyên Fîgen Yuksekdag, Selahattîn Demîrtaş, siyasetmedarên di Doza Kobanê de girtî ne û Can Atalay bilind kirin.
Parlamenterên DEM Partiyê wêneyên Rojîn Kabaîş û girtiyê nexweş Tuncer Saglam û dowîzên “Rojîn Kabaîş xwe nekuştiye” û “Budçeya we heye, edaleta we tineye” rakirin.
Parlamenterê DEM Partiyê Omer Faruk Gergerlîoglu di pêşkêşkirina Wezîr Gurlek de mafê axaftinê girt û bi gotina “Em ji bo guhdarkirina çîrokan nehatine vir” bertek nîşan da.
LI HER DERÊ BÊHIQÛQÎ HEYE
Parlamentera DEM Partiyê Dîlan Kunt Ayan diyar kir ku li Tirkiyeyê bi qeyrana aboriyê re krîza edaletê jî tê jiyîn. Dîlan Kunt Ayan bertek nîşanî bernedana Selahattîn Demîrtaş, Fîgen Yuksekdag, siyasetmedarên di çarçoveya Doza Kobanê de girtî ne, Can Atalay, Tayfun Kahraman û Osman Kavala da.
Dîlan Kunt Ayan destnîşan kir ku divê Pêvajoya Aştî û Civaka Demokratîk bi pêş ve biçe û anî ziman ku ji ber di paşerojê de wêrekî nehat nîşandan bi hezaran malbatan êş kişandin. Wê anî ziman ku divê pêvajo bi rêbazên leşkerî û bi daxuyaniyên komên biçûk neyê meşandin.
Dîlan Kunt Ayan bal kişand ser Banga Aştî û Civaka Demokratîk a ku Rêber Apo di 27’ê Sibatê de kiribû û wiha berdewam kir: “Birêz Ocalan di 27’ê Sibatê de Banga Aştî û Civaka Demokratîk kir. Ji wê rojê heta îro bi awayekî fîîlî vê pêvajoyê bi rê ve dibe û koordînasyona wê dike. Êdî Birêz Ocalan, Koordînatorê Aştî û Siyasetbûnê yê vê pêvajoyê ye û pêwîst e êdî em bi vî navî bang Ocalan bikin. Divê em van nîqaşan bi dawî bikin û êdî pêvajoyê pêştir bibin.”
Cîgirê Serokê Koma Partiya Nû Gokhan Gunaydin di komsîyonê de xwest ku têkildarî lêpirsîna li ser lîsteyeke ku tê îdiakirin navê 60 parlamenter û 30 wezîran tê de derbas dibe, daxuyanî were dayîn. Gunaydin pirsa çima lîste nayê eşkerekirin û lêpirsîn bi pêş ve naçe, kir.
