Kongreya Neteweyî ya Kurdistanê (KNK) derbarê qelibîna otubusa karkeran li nêzî bajarê Abdanan ê girêdayî eyaleta Îlamê û mirina 12 karkeran û birîndarbûna 16 kesan daxuyaniyeke nivîskî da.
Daxuyaniya KNK’ê bi vî rengî ye;
“Ev karesata xemgîn careke din rewşa xeternak û nebaş a ewlehî û binesaziya rê û rêgehan li Îranê û Rojhilatê Kurdistanê dixe ber çavan. Rewşeke ku ji ber kêmasiyên binesaziya veguhastinê, nebûna çavdêriya pêwîst û bêberpirsiyariya saziyên desthilatdar, jiyana hemwelatiyan, bi taybetî karker û beşên xizan ên civakê, dixe ber metirsiyê.
KNK bawer dike ku parastina jiyan û ewlehiya hemwelatiyan erkeke bingehîn a desthilatê ye û tu kêmasî di binesazî û pergala çavdêriya veguhastinê de nayê qebûlkirin ku bibe sedema windakirina jiyana mirovan. Ji ber vê yekê, divê lêkolîneke zelal û bêalî li ser sedemên vê karesatê bê kirin û berpirsên kêmasî, xeletî û paşguhkirinên ku bûne sedema vê bûyerê, werin pêşberî qanûn û dadperweriyê.
Em sersaxî û hevxemîna xwe ji malbat û kesûkarên kesên jiyana xwe ji dest dane, gelê hêja yê Îlamê û bi taybetî gelê Abdananê re radigihîne û xwe di xem û êşa wan de hevpar dibîne. Herwiha ji bo hemû birîndaran başbûna lezgîn û vegera wan a cem malbat û kesûkarên wan dixwaze.”
