Bi wesîleya 8’ê Adarê Roja Jinên Kedkar ên Cîhanê wê li Amedê bi dirûşma ‘Em li ber qirkirina jinê radibin, ber bi azadiyê ve dimeşin’ di 8’ê Adarê de roja Şemiyê saet 11:00 li Qada Stasyonê mîtîngek bê lidarxistin.
Seroka Komîteya Amadekar a Mîtîngê Necla Korkmaz li ser amadekariyên mîtînga 8’ê Adarê ji ANF’ê re axivî û got, “Me di 10’ê Sibatê de dest bi çalakiyên 8’ê Adarê kir. Nêzî meheke amadekariyên me hene. Di nava vê demê de li gelek qadan me çalakî lidar xist, kar kir. Bi nêzîkbûna 8’ê Adarê re kelecan jî zêde dibe. Di têkoşîna jinên Kurd de 8’ê Adarê xwedî cihekî gelekî bi wate ye.”
‘EM Ê JI BO DAXWAZÊN XWE LI QADAN BIN’
Necla Korkmaz destnîşan kir ku ji bo mafên jinan ên têne înkarkirin wê li qadan bin û got, “Hûn jî zanin têkoşîna me ya li hemberî tundî û cihêkariya li jinê bi salan e dewam dike. Em ê li qadan daxwazên xwe bînin ziman. Weke ku tê zanîn xizaniya civakî zêde dibe. Xizaniya ku bandora herî giran li jinan dike, di rojeva me de ye. Li hemberî her cûre kiryar û polîtîkayên ku zemîna rizandina civakî diafirînin, em ê li qadan bin. Bi taybetî li qadan em ê li ber qirkirina jinê, li ber tundiya li jinê rabin. Rojeva me wê bi giranî di vê çarçoveyê de be. Me dirûşma îsal jî bi vî rengî diyar kirin.”
‘EM LI BENDA JINAN IN KU DAKEVIN QADAN’
Necla Korkmaz ji bo mîtînga li Qada Stasyonê ya 8’ê Adarê roja Şemiyê banga tevlîbûnê li jinan kir û got, “Bi reng û dengê jinê em dixwazin dengê xwe di meşa azadiyê de bilind bikin. Ji bo qîrîna daxwaza azadiyê ya jinan em ê li qadan bin. Jin ji bo bibêjin em hene, divê li qadan bin. Em zanin ku em jin xwedî wê hêzê ne hem biharê bînin hem jî aştiyê bînin.”
