Li Hola Werziş û Lawan a Germiyanê ya li navçeya Kelarê (navenda îdareya Germiyanê), di merasîma çaremîn salvegera şehadeta şehîdê pênûsê Mamoste Şemal de, peyama taybet a Hevserokê Konseya Rêveber a KCK’ê Cemîl Bayîk ji aliyê Berhem Letîf ve hate xwendin.
Peyama Cemîl Bayik wiha ye:
Ji bo merasîma çaremîn salvegera şehadeta Mamoste Şemal
Li ser navê xwe û hemû hevalan, ez silav û rêzên xwe yên herî kûr pêşkêşî kesayetiya malbata şehîd Mamoste Şemal û tevahiya malbatên şehîdên Başûrê Kurdistanê dikim. Min pir dixwest ku ez li gel we tevlî vê merasîma birûmet bibim; lê mixabin ji ber ne guncawbûna şert û mercên ewlehiyê, min nekarî amade bim. Ez bawer dikim ku hûnê bi dilpakiya xwe min bibexşînin.
DOSTEK DILSOZ BÛ
Mamoste Şemal hevalekî min ê pir kevin, giranbuha û dostekî dilsoz bû. Ez bi serbilindî dibêjim; Mamoste Şemal heval, hevrê û hevxebatê min û yê tevahiya rêxistinên me bû. Ew kesekî dilsoz, xemxarê gel û pêşengê herdemî yê gelê xwe bû. Di vê salvegera birûmet û bi heybet de, ez silavên xwe dişînim ji bo malbata berxwedêr û serbilind a Mamoste Şemal (hevjîna mamoste, heval Buşra û zarokên wî, Mardîn, Rence, Kawe û Amed).
Amadevanên hêja, malbatên şehîdan û gelê azadîxwaz ê Başûrê Kurdistanê;
Mamoste Şemal kesayetek nîştimanperwer û rewşenbîrekî ê herêma Germiyanê û ji bajarê berxwedêr ê Kifrî bû. Wî bi hestên kûr ên kurdewariyê û bi dilekî tije êş, karesatên wekî Enfalê hîs dikir û ji kûr ve bi êş û azarên gelê xwe re dikişand. Wekî lêkolînerekî heqîqetê, her dem li pey têkoşîna rasteqîn digeriya; ji destpêka salên 90’î ve wekî şoreşgerekî bêguman û bi şêwazekî bibandor têkoşiya, heta ku gihîşt karwanê nemir ê şehîdan. Mamoste Şemal hevalekî rêncber û têkoşerekî dilsoz ê gelê xwe bû. Baweriyeke wî ya kûr bi têkoşîna neteweyî ya demokratîk û yekîtiya neteweyî ya demokratîk hebû. Di dirêjahiya temenê xwe yê têkoşîn û xebatê de, wî bi tu awayî parçekirina Kurdistanê û rêveberiya dagirkeran qebûl nekir; di raman, kesayet û jiyana xwe de sînorên Kurdistanê rakiribûn. Li cem Mamoste Şemal Kurdistan ne tenê yek parçe bû, belkî welatekî xwedî yek serî, yek dil û yek laş bû. Ew bi berdewamî di hemû qadên jiyanê de di nav têkoşînê de bû; di qada xebatê, di nav malbata xwe, di cihê kar, di têkiliyên hevaltî û di pêwendiyên xwe yên li gel neteweyên din de, her dem di nav hewldana avakirina yekîtiya neteweyî de bû.
Bİ QEHREMANÎ TÊKOŞIYA
Mamoste Şemal hevalekî pir dilsoz ê Rêber Apo bû. Wî bi kûrahî ramanên Rêber Apo fêm dikir û bi rêya xwendin û perwerdekirina xwe û hawirdora xwe, xwe bi paradigmaya nû re ava kiribû. Baweriyeke wî ya tam bi têkoşîna azadiya jinê hebû, li dijî zihniyeta namûsperestî û zayendperestiyê têkoşiya û di heman demê de parêzvanekî çalak ê jîngehê bû. Ew hertim di nav wan rêxistin û saziyan de cih girt ku li ser bingeha fikra Rêber Apo hatibûn avakirin û di nav têkoşîna wan de bi roleke çalak rabû. Di vî warî de beşdarî xebatên Yekîtiya Neteweyî ya Demokratîk a Kurdistanê (YNDK), her wiha wekî endamê Encûmena Partiya Çareseriya Demokratîk a Kurdistanê (PÇDK) û desteya rêveberiya Tevgera Azadiya Civaka Kurdistanê (Tevgera Azadî) cihê xwe girt. Wekî hevalekî nêzîk ê şehîdên mîna Diyar Xerîb, Viyan Caf û şehîdên herêma Germiyanê, bi dilsoziya xwe ya ji bo ked û têkoşîna şehîdan, xwedî roleke pir bibandor bû. Ev bandor bi taybetî li ser Başûrê Kurdistanê û herêma Germiyanê bi giştî hebû. Wî ji bo danasîna fikir û felsefeya Rêber Apo, her wiha ji bo pratîkirin û demokratîkkirina destkeftiyên Başûrê Kurdistanê, şev û roja xwe kiribû yek û bi canfedayî têkoşiya. Bi moral û hêviyeke pir mezin, bi wêrekî rûpelên dîroka Kurd û bandorên dagirkeriyê li ser rastiya Kurdan nivîsandin. Ji bo nîşandana rastiya erdnîgariya Kurdistanê û bandorên siyaseta asimîlasyonê û helandina nasnameya Kurdî, glek nexşe û atlas amade kirin û belav kirin. Di serî de li ser hemû komkujiyan, bi taybetî der barê karesata Enfalê de, lêkolînên herî xurt, zanistî û dîrokî kirin. Bi vê şêwazê hişyariyeke pir mezin belav kir û perdeya li ser hemû nerastiyan rakir.
ZANAYEK MEZIN BÛ
Mamoste Şemal kesayetekî bi sebir û hêmin bû; bi zanyariyeke kûr a neteweyî û li ser fikra sosyalîst a demokratîk, bi asoyekî berfireh li rûdanên siyaset û têkoşînê dimeşiya. Wekî kadroyekî avaker ê civakê, her dem li ser pîvanên demokratîk dimeşiya. Mamoste Şemal mînaka kesayetiyekî sosyalîst, dilnizm, rêncber û karker bû; her wiha di endezyariya jiyana demokratîk û di xeta neteweyî ya demokratîk de zanayekî mezin bû. Ji ber vê yekê, mîna xebatekî stratejîk di bingeh û jiyana hemû çand û dermanên herêmê de xwedî roleke giring bû û têkiliyeke wî ya pir baş li gel hemû pêkhateyên navçeyê hebû.
Amadevanên hêja;
Mamoste Şemal rewşenbîrekî pêşeng, jêhatî û kadroyekî mînak ê Rêber Apo bû; wî pîvanên bilind ên şoreşgeriyê di kesayetiya xwe de rûniştandibûn. Gotin û kirinên wî yek bûn; kesayetekî wêrek, dilsoz û demokrat bû. Mamoste Şemal di jiyana xwe de ji bo gel keleheke pola û li dijî hêzên dagirker, neyar û sîxuran jî tirseke mezin bû ku her dem ketibû dilê dijminan. Hebûna Mamoste Şemal wekî çiraya ronîkirina gel bû ji bo pûçkirina siyaseta dijminan. Ji ber vê yekê, bi planeke berfireh a dewleta dagirker û bi hevkariya sîxur û nokeran, Mamoste Şemal hate şehîdkirin û tevlî karwanê nemiran bû. Mamoste Şemal bi temenê xwe yê tije têkoşîn û kesayetiya xwe ya polayî, keleheke rewşenbîriya neteweyî û demokratîk afirand. Şehadeta wî, ev kesayetiya polayî hê bêtir kûr kir û xiste dil û hişê hemû kesên civakê. Mamoste di hişmendî, dil û wijdanê hemû gel û şoreşgeran de zindî ye û dê zindî bimîne. Pêwîste Başûrê Kurdistanê bi giştî û gelê Germiyanê bi taybetî, xwedî li malbata serbilind a Mamoste derkevin. Divê kesayet, pirtûk, şêwazê jiyanê, rêbaza têkoşînê û kesayetiya Mamoste bikin akademî, dibistan û navendên hişyarkirin û perwerdekirina hemû kesên civakê. Ji ber ku Mamoste Şemal modeleke nû û kesayetiya serkeftî ya neteweyî û demokratîke. Pêwîste bi hezaran kesên mîna Mamoste ji bo pêşengiya gel werin perwerdekirin; bi vî rengî em dikarin xwedî li şehîdan derkevin.
Di dawiyê de dibêjim; ew nirxên ku Mamoste Şemal û tevahiya şehîdan afirandine, gelê me li seranserî Kurdistanê ber bi asteke bilind ve biriye. Li ser bingeha dilsoziya bi nirx û xwîna şehîdan re, em di vê bîranîna bi heybet de soza xwe ya ji bo gelê xwe li hemû parçeyên Kurdistanê nû dikin. Ji bo gihîştina hemû mafên neteweyî û demokratîk, her wiha ji bo serkeftin, yekrêzî û yekîtiya gelê me, emê her dem di nav têkoşînê de bin.
Şehîd nirxên me yên herî mezin ên têkoşînê ne!
Şehîd namirin!
Bi rêz û silavan,
Hevalê we, Cemîl Bayîk
Hevserokê Konseya Rêveber a KCK’ê’’
