Konferansa Yekhelwestiya Pêkhateyên Bakur û Rojhilatê Sûriyeyê ya bi dirûşma “Bi hev re ji bo pirrengiya ku yekitiya me xurt dike û hevkariyeke ku siberoja me ava dike” bi peyamên nûnerên saziyên siyasî, leşkerî û ewlehî û yên pêkhateyên Bakur û Rojhilatê Sûriyeyê dewam dike.
Piştî axaftina destpêkê, hevserokê Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê Hisên Osman axivî.
Hisên Osman got: “Em îro li vir, di kêliyeke dîrokî ya girîng ji bo herêma me de dicivin. Pêdiviya qonaxê bi berpirsiyartiyeke neteweyî û civakî ya herî mezin heye, da ku em li hember zehmetiyan bisekinin, bi hev re nîşaneyên siberojeke ku layiqî fedakariyên gelên me bin, xêz bikin.”
Osman diyar kir ku pêkhateyên Bakur û Rojhilatê Sûriyeyê modelek pêşeng di hevgirtinê de, çi di qonaxa rizgarkirina herêmê de ji hêz û pergalên tarî û çeteyên DAIŞ’ê yan jî qonaxên avakirina siyasî û civakî, ava kir.
Osman anî ziman ku rola van pêkhateyan di avakirina “projeya Rêveberiya Xweser” de ku ji rêgeza hevkarî û naskirina hevbeş dest pê kiriye pêşeng bû û îro bû çarçoveyeke vîna gelên herêmê nîşan dide, xizmetê ji bo dozên adilane pêşkêş dike û destkeftiyan diparêze.
Di berdewama axaftina xwe de Osman got: “Modela Bakur û Rojhilatê Sûriyeyê îsbat kir ku avakirina Sûriyeyeke azad û demokratîk ji bilî hevgirtina pêkhateyên civaka Sûriyeyê û yekhelwestiyê, redkirina tevahî şêweyên dûrxistin û desthilatê, ne pêkan e. Ev proje projeyeke xwedî rêgezên edalet, wekhevî û nenavendiyê dihewîne û ji bo her projeyek siberojê ya Sûriyeya nû kevirê bingehîn e. Divê di vê qonaxa hestiyar de em li dijî mezhebperestî û nijadperestiyê tev bigerin. Li dijî tevahî hewlên derxistina fitneyan û dabeşbûnê bisekinin. Bi hev re ji bo welatê Sûriyeyê yê ji bo hemûyan bixebitin, ku pirrengiya çandî xurt bike.”
Di dawiyê de Osman got: “Yekitiya me misogeriya rastîn a parastina destkeftiyên me ye. Ew ji bo her kesên hewl didin mozaîka me ya civakî têk bibe, peyameke hêzê ye. Em hewl didin Sûriyeyek ji bo tevahî xelkê wê ya li ser bingeha azadî, demokrasî û rûmetê ava bikin.”
Girêdayî mijarê, hevseroka Meclisa Sûriya Demokratîk (MSD) Leyla Qereman di axaftina xwe de diyar kir ku ev konferans digel qonaxa hestiyar de pir girîng e û ji tevan tê xwestin ku parçebûnê red bikin û girîngiyê bidin siberoja welat.
Leyla Qereman got: “Em îro li vir, li bajarê Hesekê yê pirreng dicivin. Li vir nasname hev hembêz dikin û ol di nava hev re derbas bûne. Aştiya navxweyî ne bijarteyeke siyasî ye, lê şertên hebûna her çareseriyeke siyasî ya berfireh e û ji bo avakirina rêvebiriyeke rastîn e.”
Leylayê anî ziman ku modela Rêveberiya Xweser îsbat kir ku hêza civakan di yekitiya wan de ye û ev tişt diyar kir: “Ne pêkan e bêyî ku jin di pêş de cihê xwe bigirin, em li ser Sûriyeyek nû biaxivin. Tu projeyek ku azadiya jin nexe cewhera nêrîna xwe ew projeyek kêm e. Divê jin şirîkê avakirina Sûriyeya siberojê û avakirian civakeke adilane be.”
Leylayê fikarên xwe li ser zêdebûna gotinên kîndariyê li Sûriyeyê û bûyerên li perav û Siwêdayê anîn ziman û got armanc ji gotinên kîndariyê welat parçe bikin. Leylayê destnîşan kir ku MSD’ê piştgiriyê dide her însiyatîfk bi armanca hewldana yekrêziya niştîmanî û destekê dide peymana 10’ê Adarê û banga lezbûna pêkanîna bendên peymanê kir.
Di dawiyê de Leyla Qereman banga lidarxistina kongreya niştîmanî ya Sûriyeyî ya berfireh kir û got: “Sûriyeya ku em hêvî dikin ku bi şer û tolhildanê nayê avakirin. Lê bi lihevhatina niştîmanî, edaleta pêvajoya veguhê, beşdariya tevahiyan û wekheviya di nava tevahî pêkhateyan de, tê avakirin.”
Li ser navê Meclisa Jinan a Sûriyeyê ya Bakur û Rojhilatê Sûriyeyê Emîne Omer bal kişand ser şer û aloziyên li Sûriyeyê, zêdebûna gotinên kîndariyê û provokasyonên mezhebî.
Emîne diyar kir ku jinên ji Sûriyeyê rastî çewisandin û paşguhkirinekê hatin, lê niha jî ji cihê biryardanê dûr in.
Emîne Omer destnîşan kir ku jin şirîkê avakirina Sûriyeya siberojê ne û got: “Destkeftiyên jinan li Bakur û Rojhilatê Sûriyeyê bi dest xistine, ji bo tevahî jinên Sûriyeyê ne. Divê Sûriye nenavendî be û jin beşdarî proseya siyasî bibin.”
