Meşvan du rojan li bajarên cuda bi kedkar û karkeran re li hev civiyan. Meş li Enqereyê bi dawî bû. Hevserokên Giştî yên DEM Partiyê Tulay Hatîmogûllar û Tûncer Bakirhan, hevserok û hevberdevkên partiyên pêkhateyan, endamên Desteya Rêveberiya Navendî, Meclîsa Partiyê, rêveberên bajar û navçeyan ên DEM Partiyê, kedkar û cotkar tevlî bûn.
Meşvan li Parka Cemal Sureya li hev kom bûn û bi dirûşman ber bi Meclîsa Tirkiyeyê ve meşiyan. Di dawiyê de jî li ber Deriyê Dîkmenê yê Meclîsê daxuyaniyek hate dayin. Tulay Hatîmogûllari axivî û nerazîbûn nîşan da ku desthilatariya AKP-MHP’ê tîpeke budçeyê jî neguhertiye.
Hatîmogûllari diyar kir ku di budçeya 2026’an de pareke cidî ji çekan re hatiye veqetandin û got, “Dema em dibêjin budçe ji bo aştiyê, em dixwazin dawî li budçeya ji bo polîtîkayên ewlekariyê û rêveberiya şerê taybet re tê veqetandin, bê anîn. Çareseriya pirsgirêka Kurd a bi rêbazên aştiyane û demokratîk ku meseleyeke 100 salî ye û 50 salên dawî bi şer derbas bû, tê wê wateyê ku budçe ji şer û çekan re neyê veqetandin.”
Tulay Hatîmogûllari bi dewamî got, “Lê belê zêdeyî salek e em di Pêvajoya Aştî û Civaka Demokratîk de ne û desthilatdariya heyî di budçeya 2026’an de pareke cidî ji çekan re hatiye veqetandin. Li gorî salên bihurî hîn bêhtir budçe hatiye veqetandin. Nepêkane ku em vê qebûl bikin. Em careke din ji vê derê diqîrin: Budçe ji bo gel, ne ji bo şer! Budçe ji bo kedkaran, ne ji bo şer!”
Tulay Hatîmogûllari diyar kir ku mûçeyê kêmtirîn divê herî kêm 46 hezar TL be.
Tûncer Bakirhan jî anî ziman ku ji sermayeyê re, ji şer re, ji lobiyên faîzê re budçe hatiye amadekirin û got, “Em bang li Meclîsê dikin: Guh bidin daxwazên civakê. Budçeya ku we ji bo sermaye û lobiyên şer re kiriye carekê ji bo kedkaran bikin.”
Bakirhan destnîşan kir ku ji bo mûçeyê kêmtirîn bigihêje asta jiyaneke mirovî wê têkoşîna xwe dewam bikin.
