Bîranîna Komkujiya Gar a Enqerê bi pêşengiya Komeleya Aştiyê ya 10’ê Cotmehê bi tevlîbûna partiyên siyasî, rêxistinên civaka sivîl, platformên girseyî yên demokratîk û gelek welatiyan hate lidar xistin
Di çalakiya bîranînê de Hevseroka Komeleya Aştiyê ya 10’ê Cotmehê Mehtap Sakîncî daxuyaniya çapemeniyê ya hevpar xwend.
Mehtap Sakîncî, diyar kir ku piştî 10 salan ew careke din li cihê bûyerê ne û got, “Daxwaza aştiyê ya 10 sal berê hê jî pir girîng û derbasdar e.”
Mehtap Sakîncî her wiha got, “Li vî welatî heta ku edalet ji bo 104 kesên ku ji bo vê dozê jiyana xwe ji dest dane û yên din pêk neyê wê aştiyek rastteqîn pêk neyê.”
Hevserokê Giştî yê DEM Partiyê Tuncer Bakirhan û wekîlên ji partiyên siyasî yên cuda jî tevlî bîranînê bûn. Bakirhan, da zanîn ku heta berpirsiyarên komkujiyê neyên darizandin, dê têkoşîna xwe bidomînin û got, “Heta ku berpirsiyar neyên darizandin, îstîfa neyê kirin û rexnedayîn çênebe, wê ti pirsgirêk çareser nebe.”
Bakirhan got, “Ev komkujî nayê jibîrkirin; ne tenê sûcdar, di heman demê de ew kesên ku delîlan dinixumînin û edaletê asteng kirin jî.”
Bakirhan, wiha diyar kir ku ew ê têkoşîna xwe ya ji bo serketina doza aştîxwazên ku li Gar a Enqerê jiyana xwe ji dest dan bidomînin û ew ê her tiştî bikin da ku careke din komkujiyên bi vî rengî çênebin.
Piştî çalakiya bîranînê girse ber bi Dadgeha Enqerê ve meşiyan û di tevahiya çalakiyê de dirûşmeyên ku daxwaza edaletê dikin, berz kirin.
