Bi boneya nêzîkbûna 8’ê Adarê Roja Jinan a Cîhanê, Kongra Star li navçeya Amûdê meşek organîze kir. Şêniyên ji Amûdê, endamên saziyên civaka sivîl û Partiya Yekitiya Demokratîk (PYD) tevlî meşê bûn.
Meşê ji Qada Şehîd Cîhad a navenda navçeyê heta Qada Jina Azad dewam kir.
Alên Kongra Star, wêneyên cîgira Hevserokatiya Meclîsa Qamişloyê şehîd Rihan Amûdê (Leyman Şiwêş) û Hevseroka Meclîsa Qamişloyê şehîd Yusra Derwêş, şehîdên Komkujiya Helincê û pankartên bi nivîsên “Birêxistinbûna jinan bersiva êrîşên dagirkeriyê ye” û “Bi vîna jina azad em ê siyasetên qirkirin, dagirkerî û tecrîdê têk bibin” hatin rakirin.
Jinan dirûşmeyên “Jin, Jiyan, Azadî” û “Bijî berxwedana YPJ’ê” berz kirin.
Li Qada Jina Azad li ser navê Kongra Star berdevka Rêveberiya Dibistanan a Amûdê Hena Xalid axivî û diyar kir ku jin ji gelek mafên xwe ji ber nêzîkatiyên bi zîhniyeta baviksalar mehrûm man.
Hena Xalid bal kişand ser hedefgirtina jinan û wiha got: “Armanca wan jî têkbirina têkoşîna jinan e, Kongra Star bi îdeolojiya azadiya jinan xwe bi rêxsitin dike, encamên xebatên wê jî di nava Şoreşa Rojava de derdikevin û vîna jinan pê xurt dibe.”
Meş bi berzkirina dirûşmeya “Jin, Jiyan, Azadî” bi dawî bû.
