Di dozekê de ku li dijî qeyûmê ku di 13’yê Çileya 2025’an de ji bo şaredariya navçeya Akdenîzê ya Mersînê ku girêdayî DEM Partiyê bû hatibû tayînkirin, daxwaza rawestandina qeyûm hate redkirin. Dadgeha Îdarî ya 1’emîn a Mêrsînê tayînkirina qeyûmê ji aliyê walîtî ve qanûnî dît û biryara ku meclîsa şaredariyê ne xwediyê rayeya hilbijartina wekîlê şaredar e da.
‘BIRYAR NE QANÛNÎ SIYASÎ YE’
Piştî biryarê, Parlamenterê DEM Partiyê yê Mersînê Alî Bozan, diyar kir ku biryar wekî biryarek dadgehê hatiye pêşkêş kirin, lê di rastiyê de siyasî ye. Bozan, got ku ev biryar hilbijartina hikûmeta AKP’ê ye û got, “Bi vê biryarê re ne tenê hevşaredarên me yên DEM Partiyê, di heman demê de hilbijêrên ku deng dane DEM Partiyê jî hatine cezakirin.”
‘ŞAREDARÎ JI ALIYÊ KARMENDEKÎ TAYÎNKIRÎ VE TÊ BIRÊVEBIRIN’
Bozan, destnîşan kir ku di pêvajoya qeyûm de îradeya şaredariyê ji holê hatiye rakirin û got ku şaredarî li şûna şaredarên hilbijartî birêve bibin, ji hêla karmendekî tayînkirî ve tê birêvebirin. Bozan, da zanîn ku îradeya meclîsa şaredariyê bi rengekî fêîlê ji dewrê hatiye derxistin û got ku mekanîzmayek çavdêriyê tune ye.
‘DIVÊ LI BENDA BIRYARA DADGEHA DESTÛRA BINGEHÎN BIHATA SEKNANDIN’
Alî Bozan, diyar kir ku biryara tayînkirina qeyûm hem ji hêla siyasî û hem jî ji hêla qanûnî ve hevnegirtî bû. Bozan, bi bîr xist ku madeya 45’emîn a Qanûna Şaredariyê ku wekî bingeha tayînkirina qeyûm hatiye nîşandan, ji hêla Dadgeha Îdarî ya 9’emîn a Stenbolê ve ji bo Dadgeha Destûrî hatiye birin.
Bozan, diyar kir ku di vê rewşê de, Dadgeha Îdarî ya 1’emîn a Mersînê divê an bi heman awayî serî li Dadgeha Destûrî bidaya an jî li benda biryara Dadgeha Destûrî bimaya. Bozan, destnîşan kir ku ev nehatiye kirin û got, “Biryareke dadgehê ya rastîn tune. Ev bi eşkere biryarek siyasî ye ku ji hêla desthilatdariya AKP’ê ve hatiye dayîn.”
‘ŞAREDARÎ BI BIRYARÊN REWŞA AWARTE RE TÊNE DESTESERKIRIN’
Bozan, diyar kir ku tayînkirina qeyûman li ser bingeha biryarnameyên ku di dema rewşa awarte ya piştî hewldana darbeyê de hatine derxistin hatine kirin û got ku ev ne demokratîk e û ne jî rewa ye.
