Êrîşên HTŞ, DAIŞ û çeteyên girêdayî dewleta Tirk li ser Kobanê berdewam in. Hemû rêyên ku bajar bi cîhana derve ve girê didin, hem jî peydakirina sotemenî, elektrîk, av û dermanan bi temamî hatine qutkirin.
Ji ber dorpêçkirin û sermaya tund li bajêr pênc zarok jiyana xwe ji dest dane, zarokek jî bi obûsê jiyana xwe ji dest daye. Li hemberî şertên mirovahiyê yên girantir, rêxistinên civaka sivîl û nûnerên partiyên siyasî bang li Neteweyên Yekbûyî û Encûmena Ewropayê kirin ku berpirsiyariyê bigirin. Bang li raya giştî ya cîhanê jî kirin ku piştgiriya gelê Kobanê mezintir bikin.
Seroka Komeleya Zarokan a Jiyana Narin Canan Demir li ser rewşa li Kobanê ji ANF’ê re axivî û got ku pêvajoya ku tê jiyîn li dijî hiqûqa navneteweyî ye. Canan Demir bal kişand ser li herêmê pratîkên ku tew exlaqê şer jî nas nakin tên kirin û zarok, jin û sivîl rasterast tên hedefgirtin.
DIVÊ LI HEMBERÎ QIRKIRINÊ BÊDENG NEMÎNIN
Canan Demir bal kişand ku divê bi lez û bez li tiştên li Kobanê diqewimin bê rawestandin, pêvajoyeke lezgîn li qada navnetewî bê destpêkirin û bêyî dereng bikeve mudaxele bê kirin û wiha dewam kir:
“Em li ser bingeha hiqûqa navnetewî li bendê ne ku bê gotin ‘rawestin’ û bi lez mudaxele bê kirin. Mafên zarokên me li qada navnetewî mîsogerkirî ne, lê em bi xemgînî dibînin ku hewcedariyên wan ên herî bingehîn jî nayên pêşwazîkirin. Daxwaz û hêviya me ew e ku ev rewş zû bê rakirin û zarokên me bigihîjin maf û derfetên mirovahiyê. Me pênc zarokên xwe winda kirin. Çiqas rewşeke tirsnak e. Zarokên me ji ber sermayê tên qetilkirin. Mafê jiyanê yê zarokekê çawa dikare bi sedema sermayê ji destê wê bê girtin?
Divê tu kesê ku wijdan û rehm li dilê wî/ê hebe li hemberî vê yekê bêdeng nemîne. Ev rewş bi vî rengî diqewime bi rastî tirsnak e. Wekî din jî qetilkirina sivîlan, zarokên sivîl û jinên sivîl jî xemgîniyeke mezin e. Em dixwazin ev rewş di çarçoveya mafên mirovahiyê de, di şertên herî baş de ku zarokên me tê de bijîn, bi dawî bibe. Em dixwazin bigihîjin mafên xwe yên bingehîn. Jixwe daxwazkirina van mafan bi xwe şerm e, lê windakirina zarokên xwe di van şertan de bê guman xemgîniyeke kûr çêdike.”
‘DIVÊ KORÎDORA MIROVÎ VEBE’
Canan Demir bang li raya giştî ya cîhanê kir ku korîdora mirovî vebe û wiha got:
“Gava Kurd dimirin, cîhan bêdeng dimîne? Em ê çiqasî zilmê bibînin, çiqasî bên qetilkirin? Cîhan ê çiqasî li mirina zarokên me bêdeng bimîne? Ev maf ji aliyê Neteweyên Yekbûyî ve bi awayekî mîsogerkirî ne, lê çima li hemberî vê yekê ewqas bêdeng dimînin, ev li kîjan wijdanê tê? Em ê vê yekê li ser çi bingehekê binirxînin, bi rastî nizanim.
Ev qirkirin e. Hewldana tunekirina pêşeroja Kurd e. Em ji zarokan diaxivin. Kuştina zarokekê tê çi wateyê? Bêdengmayîna li hemberî mirina wê tê çi wateyê? Ev tê wê wateyê ku Neteweyên Yekbûyî alîgir tevdigerin. Gava mijar gelê Kurd be, hemû maf tên binpêkirin.
Divê korîdora mirovahi ji bo Kobanê bi lez û bez û bi awayekî acîl vebe. Ji bo ku mirovên me, xizm û birayên me bigihîjin hewcedariyên xwe yên herî bingehîn, divê her kes li cîhanê bikeve tevgerê, li gorî hiqûqa gerdûnî tevbigerin û korîdora mirovahî vebe. Bi vî awayî divê derfet ji bo gihandina tenduristî, xwarin û hemû mafên din re bê dayîn.”
