Di 15’ê Gulana 1932’yan de bi pêşengiya Celadet Elî Bedirxan, li paytexta Sûriyeyê, li Şamê Kovara Hawarê dest bi weşanê kir. Ev roj her sal ji aliyê Desteya Perwerde û Fêrkirinê, Zanîngeha Kobanê û SZK’ê ve weke Zimanê Kurdî tê pîrozkirin. Li Kobanê jî ji bo pîrozkirina Cejna Zimanê Kurdî gel li qada şehîd Egîd bi cil û bergên Kurdî li hev kom bûn û bi dirûşmeya “Zimanê gelekî hebûn û rûmeta wî ye” şahî li dar xist.
Piştî deqeyekê rêzgirtina ji bo şehîdan, Hevserokê Desteya Perwerde û Fêrkirinê a Kantona Firatê Bekir Ceradê axivî û diyar kir ku gelê Kurd xwedî dîrokek qedîm in û wiha got: ” Kiryarên li dijî mirovahî û ji bo helandin û qirkirina nasnameyê Kurdî û bi taybetî zimanê Kurdî di wan sed salan de hat kirin. Ji bo parastina nasnameya Kurdî gelek şoreş û serhildan çêbûn. Lê di Qesra Şîrîn û Skeys-Pîcot de Kurdistan parçe kirin, pêre xwestin li şûna wî zimanî zimanekî biyanî çêbikin. Lê bi şoreşê re zimanê me veguherî qonaxeke nû û bi wê yekê re jî zimanê me gihîşt astên herî bilind.”
Cîgera Encûmena Cîbicîkar Mizgîn Xelîl got ku gelê Kurd di Rojhilata Navîn de gelê herî kevnar e, ew li Mezopotamiya pêşengtî ji mirovahiyê re kir û wiha axivî: “Bi destpêkirina netew dewletê re zimanê me rastî qirkirin û pişaftinê hat, li hemberî polîtîkaya qirkirin û tunekirin, bi dehan rewşenbîr û wêjevan têkoşiyan û em bi saya wan vê rojê pîroz dikin.”
Her wiha jî ji aliyê SZK’ê xwendekarên ku di asta yekemîn ya fêrkirina zimanê Kurdî de bi ser ketin hatin xelatkirin.
Piştre jî şahî bi bernameyên hunerî ku ji aliyê komên Zanîngeha Kobanê, Çand û Hunera Baqî Xido û gerandina govendê bi dawî bû.
