Dayikên/Mirovên Şemiyê ji bo aqûbeta xizmên xwe yên di bin çavan de hatine windakirin û qetilkirin bipirsin, cara 992’yemîn li Qada Galatasarayê hatin ba hev. Ji Hevserokatiya Giştî ya Komeleya Mafên Mirovan (ÎHD) Eren Keskîn û parêzvanên mafan jî piştgirî dan çalakiyê. Di destên Dayikên/Mirovên Şemiyê de qurnefîl û wêneyên windayan hebûn. Di daxuyaniya vê hefteyê de, aqûbeta Talat Turkoglû hate pirsîn ku 1’ê Nîsana 1996’an ji bo were mala malbata xwe ya li Stenbolê ji Edirneyê bi rêket û piştre êdî agahî jê nehat wergirtin.
Endama Komîsyona Li Dijî Windakirina Kesên Di bin Çavan de ya ÎHD’ê Zeynep Yildiz daxuyanî xwend.
Di daxuyaniyê de wiha hate gotin: “Endamê JÎTEM’ê Kasim Açik got ku li Çadikent a nêzî Edîrneyê komeke ku ji polîs, leşker û îtîrafkaran pêk tê, Turkoglû lêpirsîn kirin û bi êşkenceyê kuştin û bedena wî avêtin Çemê Merîçê. Li ser vê yekê Malbata Turkoglû ji bo lêpirsîneke din jî were vekirin, serî li dozgeriyê da. Lê dozgeriyê ev yek pêk neanî.”
Xwişka mezin a Huseyîn Toraman ê di bin çavan de hatî windakirin, Sakîne Toraman jî wiha got: “Em ê dest ji lêgerîna windayên xwe, hesab pirsîna ji berpirsyaran bernedin.”
Di çalakiyê de dayika Mûrat Yildiz ê di bin çavan de hatî windakirin, Hanîfe Yildiz jî axivî.
