Desteya Rêveber a Navendî (MYK) a Partiya Demokrasî û Wekheviyê ya Gelan (DEM Partî), der barê binçavkirina gelek siyasetmedar, hunermend û rojnamevanan de ku Şaredarê Bajarê Mezin ê Stenbolê Ekrem Îmamoglû jî di nav de ye, daxuyaniyeke nivîskî da.
Binçavkirin û operosyan wek darbe hat binavkirin û wiha hat gotin: “Tevahiya van pêkaînan darbe ye. Tirkiye di pêvajoyeke darbeya sivîl a ‘dadgerî û hilberîna desthilatdariyê’ ya vekirî re rû bi rû ye ku roj bi roj bêhtir eşkere dibe û hemû mûxalefeta siyasî û civakî hedef digire. Mixabin pêkanînên bêhiqûqî, kêfî û dij demokratîk ên bi salan li dijî partî û siyaseta me hatin meşandin, di qonaxa heyî de tevahiya Tirkiyeyê dîl girtin. Tayînkirina qeyûm û zîhniyeta darbekar, komploya herî mezin a li hemberî pêşeroja Tirkiyeyê û civakê ye. Hemû hincetên ku di operasyona binçavkirinê de danîne pêş, hincetên ku nikarin vê darbe û bêhiqûqiyê binixumînin in. Hedefgirtina lihevkirinên bajaran, siyaseta demokratîk û hevpariya siyasî, tolhildana têkçûna hilbijartinên herêmî ye. Hem pêkanînên qeyûm ên duh hem jî operasyona îro, êrîşên li dijî vîna gel e.”
Di daxuyaniyê de hat ragihandin ku êrîşeke bi armanca têkbirina hêviyên gelên Tirkiyeyê yên ji bo aştî û demokrasiyê ye û wiha hat gotin: “Hewldana sabotekirina hewldana guhertinê ye ku wê li Tirkiyeyê destpê bike û li Rojhilata Navîn belav bibe. Em ti carî qebûl nakin. Ev pêkanîn wê ti carî bi kêrî Tirkiyeyê yan jî yên erê dikin neyê. Îro jî weke berê ev hemû pêkanîn wê pişta xwe bidin wijdanê civakê. Partiya me di her şert û mercî de wê têkoşîna xwe ya berfirehkirina qada siyaseta demokratîk bidomîne. Ji kê tê bila bê, wê li dijî bêhiqûqiyê, darbeyê û kêfî raweste. Bajar wê lihevkirin, têkoşîna hevpar, demokrasî, aştî û azadiyê bi biryardariyeke ji her demê mezintir biparêze. Em bangeke zelal li hikûmetê dikin; demildest dest ji van pêkanînan berde. Dest ji amûrkirina dadgeriyê berdin. Kesên îro hatine binçavkirin û bi taybetî Ekrem Îmamoglû divê tavilê serbest bên berdan.”
