Parlamenterê Colemêrgê û Alîkarê Hevserokên Giştî yên DEM Partiyê yê ji Komîsyona Rêxistiniyê ya Navendî Berpirsyar Vezîr Coşkûn Parlak têkildarî encamên hilbijartinê ji ANF’ê re axivî.
Vezîr Coşkûn Parlak bi bîr xist ku her kesî refleksa civakê meraq dikir û got, “8 sal in civak di nava şert û mercên gelekî giran ê zextê de bû. Em qala rejîmeke faşîst dikin ku êrîşî hemû nirxên civakê dike. Dema ku mafên demokratîk ên civakê têne desteserkirin, dawiya dawî civak li ber vê radibe. Dema ku mirov bala xwe didin ser encamên hilbijartinên 31’ê Adarê dibînin ku gelên Tirkiyeyê firsendeke bi vî rengî pêşkêşî me kir. Hem gelên Kurdistanê hem jî yên Tirkiyeyê ji bo hemû saziyên li qada siyaseta demokratîk ên ku tasfiye li wan tê ferzkirin, zemîneke jinûve rêxistinbûnê afirandin. Firsendek pêşkêş kir ji ber ku ev rejîma faşîst lawaz kir. Rewşa ku di dema pêş de divê em pê ve mijûl bibe ev e.”
Vezûr Coşkûn Parlak diyar kir ku li Kurdistanê, li Wanê desthilatdariyê xwest dest dîne ser îradeyê û got, “Hewl da vê firsendê bi kar bîne, lê belê gel li wê derê li ber rawestiya. Got, êdî hilbijartin têrê nake, eger a h ate hilbijartin îradeya min e, ez xwedî lê derdikevim. Ev yek bi çalakiyên demokratîk nîşan da. Li Wanê piştevaniyeke cidî ya civakî hebû. Li rojavayê Tirkikyeyê jî gelek partiyên siyasî û saziyên demokratîk di asteke cidî de xwedî lê derket. Ev yek nuqteyeke girîng e. Ji ber ku ji bo avakirina komareke demokratîk yek ji gavên herî girîng û xurt bû.
Eger em li pirsa destpêkê vegerin; berê ev şert û merc çênedibû, ji ber ku desthilatdariyê temamiya civakê dorpêç kiribû. Lê belê êdî desthilatdariyeke welê heye ku di polîtîkaya hundir û derve de îflas kiriye, bi polîtîkayên xwe yên aboriyê welat gihandiye ber krîzeke cidî ya aboriyê, gel xistiye rewşeke welê ku nikare nan bibe mala xwe, êrîşî jin û ciwanan dike, her roj zexteke giran li civakê dike. Êdî radeyeke civakê jî heye. Hêrsek kom bû û vê hêrsê xwe nîşan da.”
Parlamenter Vezîr Parlak anî ziman ku têkoşîna hevpar bêguman tenê bi hilbijartinan nabe û destnîşan kir ku rêbazeke ji têkoşîneke hevpar a her timî nîşan dide û got, “Di hilbijartinên giştî de di taktîkê de kêmasî hebûn. Ji ber vê yekê dijberiyeke tifaqê rû dabû. Lê belê bi têkoşîna li Wanê re gelên Tirkiyeyê û gelên Kurdistanê girîngiya vê tifaqê careke din dîtin. Lewma Tifaqa Ked û Demokrasiyê wê di rojên pêş de bernameyeke nûbûnê dîne pêşiya xwe. Pêwîstiyeke lezgîn bi vê yekê heye. Ji xwe pêvajoya siyasî ya em tê de ne jî vê yekê nîşan dide.
Bêguman tenê ev jî têrê nake, divê ev yek bê berfirehkirin. Li rojavayê Tirkiyeyê, li Kurdistanê divê hêzên alîgirê demokrasî, azadî, wekhevî û edaletê li hev kom bibin. Bi hev bişêwirin. Ji ber ku di rojên pêş de nîqaşên li ser destûra bingehîn a nû hene. Eger em ê pêvajoya destûra bingehîn a nû nîqaş bikin, divê kiryarên antî demokratîk, zext û binpêkirina mafên mirovan a heyî bi dawî bibe. Di serî de polîtîkaya tecrîdê ya li Îmraliyê îro li hemû girtîgehan mafên mirovan di asteke giran de têne binpêkirin. Heta ku dawî li vê zextê neyê anîn, dawî li van kiryarên antî demokratîk neyê anîn, her gava ku bê avêtin wê ji dil nebe. Em jî ji bo vê dixebitin, amadekariyên me hene. Eger wê bibe pêvajoya destûra bingehîn a demokratîk, em dibêjin ku divê saziyên demokratîk ên li Tirkiyeyê hemû li hev kom bibin. Em dibêjin ku em biçin nava gel û vê pêvajoyê bi nîqaşê bikin. Ji ber vê yekê têkoşîna hevpar ji bo gelên Tirkiyeyê û gelên Kurdistanê gelekî girîng e. Ji bo di vê mijarê de pêşengiyê bikin çi ji destê me bê em ê bikin.”
