Nîqaşên li ser qanûna çarçoveyê dewam dikin ku di çarçoveya Pêvajoya Aştî û Civaka Demokratîk de weke gava destpêkê ya dihate payin kete rojevê. Parlamenterê DEM Partiyê George Aslan nêzîkatiya civaka Suryanî ya li pêvajoyê û qanûna çarçoveyê ji ajansa me re nirxand.
‘SURYANÎ YEK JI WAN GELAN E KU HERÎ ZÊDE ZERAR DÎTIN’
Aslan anî ziman ku Suryanî yek ji wan gelan e ku ji şerê çil salî zerara herî mezin dîtin û got, “Bi destpêkirina şer re du rê li pêşiya wan bû. Ya wê rahiştibûna çeka dewletê û bibûna cerdevan, ya jî wê cih û warê xwe biterikandibûna.
Nexwestin rahêjin çekê û bibin aliyekî vî şerî. Ji ber vê jî neçar man ku cih û warê xwe yê hezaran salî biterikînin. Di dema şer de nêzî 50 Suryanî bi rengekî kiryar nediyar hatin kuştin.
Di pêvajoyên çareseriyê yên yekemîn û duyemîn de beşek ji Suryaniyan berê xwe dan welêt. Van pêvajoyan kelecaneke mezin bi xwe re neanî be jî wê demê hin mirov vegeriyan welatê xwe. Di salên 2000’î de ev veger zêde bû. Di vê demê de jî hikumet Ecevît û piştre hikumetên AKP’ê ji bo vegera li welêt bang li gelê me kirin. Hinekan guh dan van bangawaziyan û vegeriyan. Bi taybetî bi vegera di nava sê salên dawî de gelek gundên hatin valakirin jinûve geş bûn.”
‘SURYANÎ JI BER HIN GOTINAN BI FIKAR IN’
Aslan anî ziman ku hin gotinên di destpêka pêvajoyê de hatin bikaranîn li nava civaka Suryanî bûn sedema fikaran û axaftina xwe bi vî rengî dewam kir, “Ya rast, hin gotinên ku bi destpêkirina pêvajoyê re hatin bikaranîn li nava civaka Suryanî bûn sedema fikaran. Bi taybetî destnîşankirina pêvajoyê li ser ‘xwişk û biratiya olê’ ya ji aliyê Birêz Ocalan û hin siyasetmedaran ve hate kirin, her wiha qalkirina xwişk û biratiya Tirk-Kurd, Kurd-Ereb a hezar salî ji aliyê Serokkomar Erdogan ve ev fikar zêde kir û têgihiştineke bi vî rengî da gel: ‘Gelo weke ku berê bû wê yekbûna li ser bingeha Îslamê zerarê bide me?’ Me piştre ev fikarên civaka Suryanî gihand muxataban.”
‘EGER PÊVAJO BI SER BIKEVE WÊ SURYANÎ VEGERIN WARÊ XWE’
George Aslan destnîşan kir ku civaka Suryanî pêvajoyê ji nêz ve dişopîne û diyar kir ku bi serketina pêvajoyê re wê vegera Suryaniyan a li welêt zêde bibe.
George Aslan got, “Civaka Suryanî vê pêvajoyê ji nêz ve dişopîne. Di hemû civînên li gelek welatên Ewropayê de ev mijar kete rojevê. Fikara li nava Kurdan bi wan re jî heye. Gotina wan ev bû: ‘Wê me bixapînin, em ne bawer in ku ev ê aştiyê bike’.
Eger pêvajoya ji niha û pê ve bi ser bikeve û bi aştiyeke mayinde bi encam bibe, em bawer in ku Suryanî çawa ku berê ref bi ref ji welêt koç kirin, wê bi heman rengî vegerin cih û warê xwe. Ev vegera komî wê zêde bibe.”
