Makînîstê teqawid bûyî William Malet 23’yê Kanûna 2022’yan li ber Navenda Çandê ya Kurd a Ahmet Kaya ya li herêma 10’emîn a Parîsê êrîşa çekdarî pêk anî û di encamê de yek ji nûnerên tevgera jinên Kurd Evîn Goyî (Emîne Kara), muzîkjen Mîr Perwer û endamê komeleyê Abdûrrahman Kizil hatin qetilkirin û 3 kes jî birîndar bûn.
Piştî êrîşê, Malet hate binçavkirin. Malet di dema lêpirsînê de behsa “nefreta xwe ya patolojik” a li hemberî biyaniyan, kiribû.
Salek beriya êrîşê, di Kanûna 2021’an de Malet bi şûr êrîş biribû ser kampeke koçberan a li Parîsê. Ji ber vê bûyerê Malet nêzî salekê hatibû girtin û 12’ê Kanûna 2022’yan hatibû berdan. Piştî 11 rojan, êrîşî navenda çandê ya Kurd kir.
Di çarçoveya lêpirsînê de nirxandinên psîkîyatrîk derbarê wî hatin kirin. Di nirxandinan de nexweşiyeke ruhî ya cidî nehate tespîtkirin.
22’yê Tîrmeha 2025’an ji aliyê sê darazan ve îdîaname hate amadekirin. Di îdîanameyê de hatibû nirxandin ku 3 kes ji ber nîjadê hatine kuştin û hat diyarkirin ku ji bo Malet ji sûcên teşebûsa cînayetê were darizandin, îspata têrker heye. Lê belê ji ber ku bûyer di çarçoveya sûcê terorê de nehate nirxandin, Kurdan û gelek derdorên siyasî nerazîbûn nîşan dan.
Civaka Kurd a Demokratîk a Fransayê (CDK-F) diyar kir ku navend bi zanebûn hate hedefgirtin û destnîşan kir ku êrîş di karakterê “terorîst” de ye. Lê belê tevî daxwazên Kurdan jî, têkildarî têkiliyên derve yên êrîşê servîsa îstixbaratê ya Fransa tevlî lêpirsînê nehate kirin, nerazîbûnên li dijî vê didomin.
Sala 2013’an jî li herêma 10’emîn a Parîsê sê jinên aktîvîst ên Kurd hatibûn qetilkirin.
Ji damezrînerên PKK’ê Sakîne Cansiz (Sara), Nûnera KNK’ê ya Parîsê Fîdan Dogan (Rojbîn) û endama Tevgera Ciwanên Kurd Leyla Şaylemez (Ronahî) 9’ê Çileya 2013’an li Buroya Enformasyonê ya Kurd a li navenda Parîsê hatibûn qetilkirin.
Di lêpirsîna têkildarî vê êrîşê de, hemû berê hemû nîşaneyan li Enqere bû. Lê belê, Fransayê di çarçoveya lêpirsînê de sira dewletê ranekir.
