Kurdistanî û dostên wan çalakiyên xwe yên di çarçoveya pêngava ‘Azadî ji Rêber Apo re, çareserî ji pirsgirêka Kurd re dewam dikin. Di salvegera 26’emîn a Komploya Navneteweyî de wê gelek çalakiyên girîng bêne lidarxistin. Berdevkên pêngavê Zubeyde Zumrut, Hatîp Dîcle û Sînan Onal bersiv dan pirsên ANF’ê.
PROJEYA WÎ ÇARESERIYÊ JI BO KRÎZAN PÊŞKÊŞ DIKE
Hatîp Dîcle anî ziman ku Rêber Apo bi projeyên xwe yên ji bo çareseriya krîzên li Rojhilata Navîn û cîhanê bûye rêberekî navneteweyî û anî ziman ku ji ber vê rola wî daxwaza ‘Azadî ji Rêber Apo re’ bûye daxwazeke navneteweyî. Dîcle çalakiyên dostên gelê Kurd bi vî rengî vegot, “Di 16’ê Sibatê de li Parlamenta Ewropayê Tora Navneteweyî ya ‘Azadî ji Ocalan re’ ava bû. Piştre torên ji hiqûqnas, jin û ciwanan ava bûn. Her wiha li her welatî sendîka, parlamenter û aktîvîstan torên xwecihî ava kirin. Înîsiyatîfa Xelatgirên Nobelê jî tevlî vê pêvajoyê bûn.”
ARMANC AZADIYA WÎ YA FÎZÎKÎ YE
Dîcle ragihand ku armanca destpêkê ya pêngavê ve ew bû ku girseyî bibe û balê bikişîne ser mijarê û destnîşan kir ku di encama çalakiyên berfireh de zext li ser Tirkiyeyê hate kirin, rastiya tecrîdê hate nîşandan. Dîcle bal kişand ser qonaxa duyemîn a pêngavê ku armanc jê azadiya fîzîkî ya Rêber Apo ye û got, “Hewldanên danîna diyalogê ya dewleta Tirk a bi wî re, weke pêkhateyên kampanyaya ‘Azadî ji Abdullah Ocalan re, çareserî ji pirsgirêka Kurd re’ ji me dixwaze ku em hîn bi xurtî û rêxistinî daxwaza azadiya wî bikin.”
ÇARESERÎ JÎ WÊ BI AZADIYA WÎ PÊK WERE
Dîcl anî ziman ku çareseriya pirsgirêka Kurd wê bi azadiya fîzîkî ya Rêber Apo pêk were û got, rastiya êşkenceyê ya ku li Rêber Apo tê kirin êdî ji aliyê hemû gelan ve hatiye dîtin, şêweyê jiyana ekolojîk, demokratîk û azadîparêziya jinê jî tê xwedîderketin.
ÇALAKIYÊN BERFIREH
Ji berdevkên pêngavê Zubeyde Zumrut jî meş û mîtînga mezin a par li bajarê Koln ê Elmanyayê hate lidarxistin bi bîr xist û got, îsal li bajarê Strasbourg ê Fransayê wê çalakiyeke berfireh bê lidarxistin. Zubeyde Zumrut ragihand ku ji gelek welatan wê tevlîbûn li vê çalakiyê bibe. Li gorî Zubeyde Zumrut çalakî wê ne tenê li Ewropayê, her wiha li çar parçeyên Kurdistanê û tevahiya cîhanê belav bibin, kampanyayên îmzeyan, meşên dirêj, meş û mîtîngên girseyî wê çalakiyên vê pêvajoyê bin.
SERERASTKIRINA MAFÊ HÊVIYÊ WÊ BIKEVE ROJEVÊ
Zubeyde Zumrut diyar kir ku çalakiyên di salvegera komploya navneteweyî de bêne kirin pêwendiya xwe yekser bi nîqaşên li ser diyalog û pêvajoyê yên li Tirkiyeyê hene û got, “Dewleta Tirk gihîşt wê astê ku êdî nikare rastiya tecrîdê veşêre û pêvajo gihîşt asteke cuda. Piştî 49 mehan yekemcar Birêz Abdullah Ocalan biraziyê xwe dît û du caran bi du parlamenterên DEM Partiyê re hevdîtin kir. Ji bo Rêber Apo wê sererastkirina ‘mafê hêviyê’ bikeve rojevê.”
Zubeyde Zumrut manîfestoya ji 7 xalan a ku Rêber Apo di hevdîtina 28’ê Kanûna 2024’an de pêşkêş kir bi bîr xist û got, “Ev hemû nîşan dide ku azadî û çareserî yan jî aştî yekser bi hev ve girêdayî ne.”
TEVGERA GIRSEYÎ Û CIVAKÎ
Ji berdevkên pêngavê Sînan Onal bal kişand ser armancên stratejîk ên kampanyayê û destnîşan kir ku kampanya wê sala 2025’an hîn kûr û berfireh bibe. Onal anî ziman ku tevgera girseyî û civakî wê hîn berfireh û timî bibe û got, “Bêguman gelên Kkurdistanê bi jin, ciwan û extiyarên xwe hem li welêt hem jî li her devera dîhanê li gel dostên xwe timî li qadan bûn. Em dixwazin vê yekê hîn bi rêxistin bikin û veguherînin çalakiyên mezin.”
HEWLDANA HIQÛQÎ YA NÛ WÊ BÊ KIRIN
Onal destnîşan kir ku yek ji armancên herî mezin ên kampanyayê jî wê ew be ku ‘Li dadgehên navneteweyî li hemberî polîtîkayên tecrîdê û sûcên şer ên Tirkiyeyê hewldanên hiqûqî yên nû bêne destpêkirin’. Onal anî ziman ku piştî civînên ji hemû pêkhateyên kampanyayê wê di nava meha Nîsanê de bi konferanseke mezin plansaziyeke hevpar bê amadekirin, li Konseya Ewropayê, Parlamenta Ewropayê û Neteweyên Yekbûyî wê hewledan bêne kirin.
EM TÊKOŞÎNÊ MEZIN BIKIN
Berdevkên pêngavê herî dawî ev bang li gelê Kurd û dostan kirin: “Sala 2025’an ji bo herêmê î cîhanê dem û saleke gelekî girîng e, ev yek ji bûyerên siyasî jî tê fêhmkirin. Ji bo kampanya bi ser bikeve divê em têkoşînê li her derê hîn mezin bikin, hîn bi rêxistin bikin û dengê xwe hîn bilind bikin.”
