Di şer û êrîşên dagirkeriyê yên dewleta Tirk û çeteyên wê de cihên ku tê de zirar dîtine û beşek mezin jê hate rûxandin Taxên Şêxmeqsûd û Eşrefiyê yên Helebê bûn. Taxên Şêxmeqsûd û Eşrefiyê bi çirûska Şoreşa Rojava re ew jî daketin qadan. Taybet bi sala 2016’an re û bi êrîşên komên çete yên girêdayî dewleta Tirk li ser taxê re, şervanên YPG- YPJ û gelê taxê bi her awayî li hember wan koman li ber xwe dan û navê Şêxmeqsûd li dîrokê nivîsandin.
Gelê taxê li aliyekî taxên xwe ji êrîşên çeteyan parastin û li aliyê din jî xwe bi rêxistin kir û sazîyên xwe avakirin. Yek ji wan saziyan jî şeredariya gel bû. Ji ber tax demek dirêjî ji aliyê komên çete ve hat dorpêçkirin û ambargoya rejîma Baasê ya li ser taxê, şeredariya gel xebatên xwe li ser tamîrkirina karên lezgîn meşand.
DI XEBATÊN ŞAREDARIYÊ DE ZEHMETÎ DIHATIN KIŞANDIN
Hevşaredara Taxên Şêxmeqsûd û Eşrefiyê Emîne Beyram li ser kar û xebatên şaredariyê ji ANF’ê re axivî. Emîne Bayram diyar kir ku şaredarî bi Şoreşa Rojavayê Kurdistanê re weke saziyekê xwe bi rêxistin kir û wiha got: “Di xebata şeredariyê de astengiyên mezin dihatin kişandin. Derfetên şaredariyê pir kêm bûn û ji ber vê yekê xebat kêm dihatin meşandin. 13 salan ambargo û êrîş li ser taxê hate meşandin. Ji ber madeyên ango pêdivîyên ku pê werin karkirin derbasî taxê nedibûn, di çêkirina binesaziya taxê û cihên ku zirar dîtine de zehmetî hatin kişandin. Taxên Şêxmeqsûd û Eşrefiyê weke taxên Helebê nedihatin destgirtin her tim cûdahiyek di navber herdu taxan û taxên Helebê de hebû.”
‘TAXÊN ME BI PÎŞESAZÎ Û BAZIRGANIYÊ TÊ NASÎN’
Emîne Beyram li ser peymana di navber Hevserokên Taxên Şêxmeqsûd û Eşrefiyê û Hikûmeta Şamê de hate îmzekirin jî axivî û wiha domand: “Di peymana hate îmzekirin de xala 5’an li ser xizmetguzarî û şaredariyê ye. Di çarçoveya vê xalê de bendên kontrolê yên ku bi axê hatibûn avakirin hatin rakirin. Armanca vê ji rakirina axê zêdetir ew bû taxên Şêxmeqsûd û Eşrefiyê bi karên pîşesazî û bazirganîyê tê naskirin da ku rê li pêşiya gel bê vekirin û bi rehetî karê xwe bikin. Li ser wê esasê Şaredariya Helebê ya giştî tevî şaredariya gel bi erka xwe rabû.”
XISÛSIYETA TAXÊN ŞEXMEQSÛD Û EŞREFIYÊ HENE
Hevşaredar Emîne Beyram anî ziman ku li gorî peymana ku hatiye îmzekirin komîteyek ji şaredariya gel wê cihê xwe di nav Şeredariya Giştî ya Bajarê Helebê de bigire û wiha dawî li axatina xwe anî: “Taxên Şêxmeqsûd û Eşrefiyê jî wê xizmetên Şaredariya Giştî ya Bajarê Helebê sûdê bigirin. Wê taxên me jî weke taxên din para xwe di avakirinê de bigire da ku astengiyên ku berê hatine kişandin careke din dubare nebin. Lê xebat û makanîzmeya sîstema şaredariya me ya ku me berê avakiriye wê neyê guhertin û domdar be. Ji ber ku xisûsiyeteke taxê heye.”
