Di 13’ê Kanûna 2025’an de li Hollandayê Konferansa 1’emîn a Yekitiya Neteweyî ya Jinên Kurd a Ewropayê hat lidarxistin. Konferansa bi peşengtiya Înîsiyatîfa Jinên Kurd a li Ewropayê bi beşdariya 154 jinên Kurd pêk hat. Encamnameya konferansê hate ragihandin.
Encamname bi vî rengî ye:
“Ji ber sedema dagirkeriya li ser Kurdistanê em jinên Kurd di nava sed salên derbasbûyî de koçberê çar aliyê cîhanê bûn. Wek jinên Kurd, ji ber vê koçberiyê me gelek êş û azarên mezin kişandin. Cîh û warên me hatin talankirin û em hatin penaberkirin; lê me tu carî dev ji têkoşîn, evîn û hêviya xwe ya ji bo Kurdistaneke azad, çand û nasnameya xwe berneda. Hem wek jin û hem jî wek Kurd ji bo pêşerojeke azad pêwîstî heye ku jinên Kurd hêza xwe bi ruhê yekitîya neteweyî bikin yek. Hedef û armanca konferansa 1. a jinên Kurd avakirina yekîtiya neteweyî ya jinên Kurd li Ewropayê ye.
Ji bo pêşeroja jinên Kurd li Ewropayê di konferansa 1’emîn a Înîsiyatîfa Yekitiya Jinên Kurd li Ewropayê de ev biryar hatin girtin:
1. Di konferansê de biryar hat girtin ku Yekîtiya Netewî ya Jinên Kurd a li Ewropayê êdî wek platform kar û xebatên xwe bimeşîne.
2. Biryar e ji bo meşandina kar û xebatên platformê rêveberiyeke ji 21 kesan pêk tê were hilbijartin.
3. Jinên Kurd li Erwropayê li hemberî hemû şewazên êriş, destdirêjiyên li ser nirxên jinan û neteweyî hişyar in û xwedî helwest in. Ji bo vê xwepeşandanên bi ruhê yekitiya neteweyî dê pêk bînin.
4. Jinên Kurd li Ewropayê xwe li hember pêşketin, qeyran û şerê li ser Kurdistanê berpirsiyar dibînin û ji bo aştiyê dê bi hev re têbikoşin. Ji bo wê li Ewropayê karên siyasî, civakî û dîplomatîk dê zêdetir werin kirin.
5. Jin, piştgiriyeke aktîf dê bidin pevajoya nû ya ji bo çareseriya pirsgirêka Kurd li Bakurê Kurdistanê; dê ji bo peşîgirtina hemû xeteriyên li Rojavayê Kurdistanê hewleke netewî bê dayin; ji bo parastina statûya heyî ya Başûrê Kurdistanê dê bi yek dengî li ber xwe bidin; û li hember zor û zexta dewleta Îranê li Rojhilatê Kurdistanê têkoşînê li ser asta neteweyî xurttir bikin.
6. Li dijî şîddet-tundiyê divê têkoşîneke hevbeş bê meşandin û mafê jinan bê parastin.
7. Li dijî hemû şîdeta dewletên dagirker li ser jinên Kurd pewîste bi têkoşîna dîplomatîk-siyasî di nav saziyên navdewletî de li Ewropayê kar bên meşandin.
8. Ji bo xurtkirina pêywendiyên di navbera jinên ji çand, bawerî û neteweyên din ên li Ewropayê de danûnstandinên dostanî û hevaltiyê bên pêşxistin.
9. Divê li hemberî zehmetî û pirsgirêkên jinên li dîasporayê pêre rû bi rû dimînin (bişaftin-asîmîlasyon, nijadperestî), li hemberî helandinê helwesteke hevbeş bê nîşandan.
10. Ji bo pêşxistin û qebûlkirina fermî ya çand, bawerî û zimanê Kurdî li welatên Ewropayê divê kar û xebatên hevbeş bên meşandin. Bang li hemû malbatên Kurd dikin ku ji bo parastina ziman û nasnameyê erka xwe bi cih bînin.
11. Divê jinên Kurd li derveyî welat (Ewropayê), ji bo aboriya xweser (autonom) projeyên hevbeş pêş bixin. Her wiha ji bo projeyên ji bo alikariya jinên Kurd ên li welat jî xwedî helwesteke xurt bin.
12. Divê di nava her şert û mercî de, mafê jinan ê siyasî, aborî, civakî, bi têkoşîneke hevbeş bê parastin.
13. Di konferansê de bang hat kirin ku demeke zûtirîn konferanseke neteweyî di asta Kurdistanê de bê komkirin, yekîtiya neteweyî bê xurtkirin û jin jî wek pêşeng di nav de cih bigirin.
14. Ji bo rojevkirina mijarên hevbeş (koçberî, tundî, aborî, çand û ziman û hwd.), bi awayekî demdirêj, demkurt, semîner, komxebat bên plansazkirin.
15. Ji bo bîra (hafiza) jinan a hevpar bê avakirin, xebatên arşîvî bên çêkirin.
16. Ji bo rizgarkirina jinên Êzidî ku heta niha wek civak rastî 72 ferman-jenosîdan hatine, platform li ser asteke neteweyî û navneteweyî bixebite.
17. Ji bo konferans, semîner û panelên ji îro pêde werin lidarxistin, dê zimanê Kurdî bi her sê zaraveyên xwe (Kurmancî, Soranî û Zazakî) cih bigire.
18. Platform, ji bo karesata lehiyê ya li Çemçemal û Kerkûkê çêbûyî ku bûye sedema malwêranî û windahiyan, sersaxiyê dixwaze û êşa malbatan parve dike. Herwiha banga alîkariyê dike.”
