Newroza 2025’an bi dirûşmên ‘Rêbertiya Azad Civaka Demokratîk’ û ‘ Newroza Civaka Demokratîk ji bo Azadiyê’ ji aiyê bi milyonan mirovî ve bi coş tê pîrozkirin. Gerîlayên azadiyê yên li Herêmên Parastinê yên Medyayê şer dikin, Newrozê bi coş û kelecaneke mezin pêşwazî dikin. Gerîla dibêjin, Newroza vê carê wê bibe Newroza pêkhatina azadiya fîzîkî ya Rêber Apo.
Ferman Penaber: Newroza 2025’an di serî de li afirînerê azadiyê Rêber Apo, li gelê me, girtiyên azadiyê, hevrêyên li çeperên berxwedanê şer dikin, di şexsê Mazlûm Dogan, Rahşan û Zekiye de li şehîdên azadiyê yên Kurdistanê pîroz be. Bawerî û biryardariya me hêzên HPG’ê tam e. Ev Newroz wê bibe Newroza azadiya Rêberê me û Kurdistanê. Ji bo ev Newroz ji gelên mezlûm re bibe Newroza azadiyê em ê têbikoşin.
Newroz ji bo me xwedî cihekî taybet e. Weke ku tê zanîn di dîroka me de Kawayê Hesinkar li hemberî Dehaqê zalim bi ser ket û agirê Newrozê yê azadiyê dada. Di serdema heyî de jî Mazlûm Dogan weke şopdarê Kawayê Hesinkar li zindana Amedê çirûska destpêkê vê xist û agirê Newrozê ji nû ve geş kir. Di encama fedakariyeke mezin a Rahşan, Zekiye û gelek hevalan de Newroz îro ji aliyê bi milyonan mirovî ve tê pîrozkirin. Em bi saya wan gihîştin vê astê. Newroz azadî ye, ji bo me cejna neteweyî ye. Newrozê careke din li Rêbertî û hemû gelên herêmê pîroz dikim.
Delîl Hawar: Beriya her tiştî Newrozê li Rêber Apo, li hevrêyan û gelê me pîroz dikim. Em ê Newrozê bi ruhê şoreşgerî bikin bingeha azadiya fîzîkî ya Rêbertî. Bijî Rêber Apo, Bijî Newroz.
Mahîr Apocî: Newroza 2025’an li afirînerê azadiyê li Rêber Apo pîroz be. Her wiha cejna Newrozê li gelê me, li hevrêyên li çeperan li ber xwe didin pîroz dikim. Em hêvîdar in ku Newroz bibe wesîleya azadiyê ji gelên Kurdistanê û herêmê re. Em bi vê biryardariyê nêzî Newrozê dibin. Bijî Rêber Apo, Bijî Newroz.
EM JI AŞTIYÊ RE JÎ JI ŞER RE JÎ AMADE NE
Mazlûm Çiyager: Di serî de Rêber Apo em cejna Newrozê li hevrêyên xwe yên li çeperên berxwedanê têdikoşin, li şehîdên azadiyê yên Kurdistanê û li gelê Kurd pîroz dikin, em soz didin ku em ê têkoşîna wan bi serketinê tacîdar bikin. Di sala 2025’an de ji bo azadiya fîzîkî ya Rêber Apo pêk were em ê têbikoşin, li ber xwe bidin. Armanca me ew e ku vê salê bikin sala azadiyê ya Rêber Apo û gelan. Di vê çarçoveyê de divê armanca me hemûyan azadî û civaka demokratîk be. Bi pêşengiya Rêber Apo bi metna ‘Banga Aştî û Civaka Demokratîk’ pêvajoyeke nû destpê kir. Weke gerîlayên HPG û YJA Starê em heta dawiyê bi Rêberê xwe re ne. Çi ji destê me bê em ê bikin. Em ji aştiyê re jî, ji şer re jî amade ne.
Newroz ji bo gelê me pîroz e, xwedî wateyeke mezin e. Newroz ji bo Kurdan serhildan e. Îro roja rizgariya ji dîktatorî, qirkirin û zilmê ye. Weke gerîla em li gorî wateya vê rojê pîroz dikin. Newroz ji bo me gelekî hêja ye, afirandina ruhê berxwedana me ye. Bijî Newroz, Bijî Rêber Apo.
Kûrtay Dêrazor: Newrozê li Rêber Apo, gelê Kurd, girtiyên azadiyê û li hemû hevalên li çeperan li ber xwe didin pîroz be. Newroz ji bo Rêberê me, gelê me û tevgera me xwedî wateyeke gelekî mezin e. Ji bo agirê ji aliyê hevalê Mazlûm Dogan ve hate vêxistin were geşkirin em ê têbikoşin. Ji bo çirûka Newrozê ya Mazlûm Dogan bi ser bixînin em ê bijîn. Çi dibe bila bibe, ji bo Newroza 2025’an bikin sala azadiya fîzîkî ya Rêber Apo em ê şer bikin.
