Rojnameya îdeolojîk, teorîk û polîtîk Komînal a ku li Ewropayê tê weşandin, bi manşeta “Di zîhniyeta înkarê de guhertin nîne” hejmara xwe ya nû çap kir.
Di vê hejmara rojnameya Komînal de hevpeyvîna bi Endamê Akademiya Zanista Civakî ya Abdullah Ocalan Dûran Kalkan ji manşetê hate dayin. Kalkan li gel zîhniyeta dewleta Tirk mijarên; Pêvajoya Aştî û Civaka Demokratîk, sererastkirinên qanûnî yên têkildarî PKK’yiyan, rola Rêber Apo ya di pêvajoyê de û bûyerên li Rojhilata Navîn nirxand.
Kalkan di destpêka hevpeyvînê de qala ragihandina şehîdan û bîranînan kir û got, “Kes nikare vî gelî ji şopa şehîdan û doza wan vegerîne. Dijberên xwe çi dibe bila bibe, çiqasî êriş lê bê kirin jî wê her tim rêya xwe bibîne, li ser rêya rast bimeşe, her cûre êrişan bişikîne û jiyaneke demokratîk û azad ava bike.”
‘DI MEJIYÊ ÎNKARÊ DE GUHERTINEKE CIDÎ NÎNE’
Dûran Kalkan li ser Pêvajoya Aştî û Civaka Demokratîk nirxandinên berfireh kir û anî ziman ku di nava sîstema heyî de komara demokratîk û siyaseta demokratîk nîne. Kalkan anî ziman ku zîhniyeteke li ser esasê Tirkperest, Îslama Sûnî û netewe-dewletê dewam dike û got, “Dibêjin em biguherin û veguherin, lê belê me mejî ne jî siyaseteke xwe heye ku guherîn-veguherînê bikin. Di siyaset û zîhniyeta ku Kurdan înkar dike de hîn guhertineke cidî nehatiye kirin.”
Kalkan ragihand ku qebûlkirina hebûna Kurdan tenê di asta gotinê de têrê nake û got, “Bi şermokî jî be dibêjin Kurd hene, lê belê Kurdekî çawa? Gelê Kurd nayê pênasekirin. Naxwaze mafên vî gelî nas bikin. Ev nêzîkatî hîn jî dewam dike.”
‘QANÛN PIRANIYA PKK’YIYAN NAGIR NAVA XWE’
Kalkan Qanûna Çarçoveyê nirxand û bi bîr xist ku qanûn PKK’yiyan û Rêber Apo nagire nava xwe. Kalkan got, “Qanûn piraniya PKK’ê nagire nava xwe. Rêber Apo nagire nava xwe. 800 kadroyan nagire nava xwe. Weke qanûneke ji bo PKK’ê hatiye derxistin tê pênasekirin lê belê di rastiyê de ne qanûneke ku ji bo PKK’yiyan hatiye derxistin. Weke qanûneke welê xuya dike ku ji bo alîgirên PKK’ê hatiye derxistin.”
Kalkan bal kişand ser nîqaşên li ser Îmraliyê û got, ‘Dibêjin li Îmraliyê ‘vîlla hatiye çêkirin’. Dibêjin, ‘Malek hatiye çêkirin ku derfetên xwe gelek in’. Li şûna ku vê bikin bila deriyên Îmraliyê vekin, bila çapemenî û sazî biçin. Bila bibînin bê çi hatiye çêkirin, çi heye.”
‘DIVÊ PÊVAJO LI SER BINGEHA AŞTÎ Û SIYASÎBÛNÊ BÊ MEŞANDIN’
Dûran Kalkan destnîşan kir ku pêvajo nabe ku bi têgihînin bê wate yên weke ‘bêçekbûn’ û ‘stratejî’ bê meşandin û destnîşan kir ku karakterê bingehîn ê pêvajoyê ‘Aştî û siyasîbûn’ e. Kalkan got, “Lewma navê saziya ku vê pêvajoyê bimeşîne jî divê ‘Koordînatoriya Aştî û Siyasîbûnê’ be. Wezîfeya koordînatoriyê jî divê ji aliyê Rêber Apo ve bê meşandin.”
Kalkan di hevpeyvîna xwe de bûyerên li Rojava, Rojhilat û Şengalê, her wiha şerê hegemonya li Rojhilata Navîn û pozîsyona Tirkiyeyê ya li herêmê nirxand.
Di hejmara Cotmehê ya rojnameyê de li gel beşek bi sernavê ‘Di dîrokê de têkiliyên Kurd û Tirkan’ a ji Manîfestoya Civaka Komînal a Demokratîk, nivîsek ji Akademiya Zanista Civakî ya Abdullah Ocalan, her wiha karê bi sernavê ‘Şehîd soza jiyanê ye’ ya Komîna Karên Şehîdan hate weşandin.
Nivîsa ‘Ya ku komplo têk bir paradîgmaya Rêbertî ye’ ya Hêlîn Umît, nivîsa ‘Bawerî tifaqa demokratîk bi ser dixîne’ ya Cîhan Eren û nivîsa bi navê ‘Şoreşa pozîtîf’ a Cemal Şerî di hejmara vê mehê ya rojnameyê de hate weşandin.
Di wêneyê berê yê paş ê rojnameyê de helbesta bi Kurdî ya ‘Gotin egîdek şehîd ketiye’ ya Şehîd Zamanî (Mûstafa Gezgor) li gel wêneyê Zamanî hate weşandin.
Rojnameya Komînal li Navendên Civaka Demokratîk ên li Ewropayê û Mala Kurdan dikare bê peydakirin.
Rojname her wiha di 15’ê her mehê de bi Kurdî û Tirkî li ser malpera kominalgazete.com dikare bê xwendin.
