Pêvajoya ku 27’ê Sibatê bi ‘Banga Aştî û Civaka Demokratîk’ a Rêber Apo destpê kir, li Başûr bi merasîma şewitandina çekan derbasî qonaxeke krîtîk bû.
Hevserokên Kongreya Civakên Demokratîk a Kurdistaniyên li Ewropayê (KCDK-E) ku nûnerê rêxistiniya Kurdan a li dîasporayê ye Zubeyde Zumrut û Engîn Sever banga Rêber Apo, îmhakirina çekan a Koma Aştî û Civaka Demokratîk û bendewariya ji dewletên Ewropayê ji ANF’ê re nirxandin.
Zubeyde Zumrut di destpêka axaftina xwe de got, “Weke jineke Kurd bi rastî jî gelekî hestewar bûm. Bi vê têkoşînê re min nasnameya xwe, nasnameya jinê nas kir. Bi vê têkoşînê re hewl dam hebûna xwe biparêzim. Lewma ji bo min bihîstina dengê Rêbertî hesteke welê ye ku nayê vegotin. Weke ku tê gotin, atmosfereke cejnê bû.”
Engîn Sever jî di destpêka axaftina xwe de got, “Min çavên xwe bi vê têkoşînê vekir. Weke ku di dilê her zarokekî de lehengek heye; di dilê her Kurdekî de jî gerîla leheng e. Gerîla ji bo gelê Kurd, ji bo zarokên Kurd, ji bo jinên Kurd leheng e. Her kes gerîla weke pêşeng, rêbazeke jiyanê dît.
Çek rêbazeke rewa ya têkoşînê bû ku Kurdan ji bo hebûna xwe, ji bo nasnameya xwe, ji bo zimanê xwe û ji bo jiyana bi rengekî azad a li warê xwe ji neçarî rakir. Rêber Apo ev yek di hemû daxuyaniyên xwe de dianî ziman.
Di vê demê de bihîstina dengê Rêber Apo, dîtina wêneyê wî, banga wî ya bi dengê xwe ji gel re, kelecaneke mezin afirand.”
Li ser rola Ewropayê ya di vê pêvajoyê de Zubeyde Zumrut got, “Bêguman rol Ewropayê girîng e. Ji bo çareseriya meseleya Kurd divê Ewropa bi rola xwe rabe. Gelek dewletên cîhanê piştgirî dan banga 27’ê Sibatê û daxuyanî dan. Di vê pêvajoyê de divê qîma xwe tenê bi piştevaniyê nînin.
Divê Ewropa yekser tevlî vê meseleyê bibe û ji bo çareseriyê bi rol rabe. Eger Ewropa di vê mijarê de rola xwe bi cih bîne, ev mesele wê zêde dirêj nebe. Ev yek wê bandorê li têkiliyên Tirkiyeyê yên bi welatên Ewropayê, têkiliyên polîtîk û têkiliyên aboriyê bike.”
Zubeyde Zumrut bi dewamî destnîşan kir ku divê Elmanya nêzîkatiya xwe ya polîtîk a li hemberî Kurdan biguherîne û got, “Ji ber ku PKK qedexxe ye, ev yek dibe sedem ku Kurd hemû bêne krîmînalîzekirin û ev yek bandoreke neyînî li pêvajoyê dike. Kar û têkoşîna polîtîk a li Elmanya û gelek welatên Ewropayê ji ber vê qedexeyê bi rengekî cidî têne astengkirin.”
Engîn Sever destnîşan kir ku Ewropa bi salan xwedî hevkariyeke aborî, siyasî, leşkerî û dîplomatîk bi dewleta Tirk re ye û got, “Dewleta Tirk weke endamekî NATO’yê bi welatên Ewropayê re dixebite û bi hev re biryarê didin. Ji ber vê yekê dikarin biryarên welê werbigirin ku bandorê li dewleta Tirk bikin.”
Li ser rêxistiniya civaka Kurd a di vê pêvajoyê de Zubeyde Zumrut got, “Ev pêvajo wê bê birêxistinkirin. Têkoşîn dewam dike. Ev destpêkek e. Navê xwe li ser e: Avakirina Aştî û Civaka Demokratîk. Lewma nifûsa Kurd a li Ewropayê di vê mijarê de divê li ser zemîneke demokratîk têkoşîna xwe bi rêxistin bike.
Di rewşa heyî de xwedî avaniyeke rêxistinî ye û ev avanî jî gelekî xurt e. Bi taybetî bi koç û sirgûnên salên dawî re nifûsa Kurdan a li dîasporayê gelekî zêde bû. Em qala nifûseke Kurd a di ser 4 milyon mirovî ya li Ewropayê dikin. Ev nifûs jî wele gelên din divê xwe bi rêxistin bike. Li gel vê yekê ji bo parastina ziman, çand û pêşvebirina xwe, divê xwe bi rêxistin bike. Di bin sîwana KCDK-E’yê de konfederasyonên me hene. Lewma divê ev avanî bê mezinkirin û xurtkirin.
Têkildarî pêvajoya pêşiya me li Ewropa û dîasporayê me bi sedan civîn lidar xist. Di vê mijarê de weke ku di gelek bernameyên xwe de me diyar kir, dixwazim li vir jî dubare bikim: Li her devera ku Rêber Ocalan lê ye windakirin teqez nabe. Civak di vê mijarê de heta dawiyê bawer dike û piştrast e. Em jî weke Kurdên li Ewropayê bi berpirsyariyên xwe vê pêvajoyê dimeşînin û em ê bimeşînin.
Heta ku bi gelê xwe re vê têkoşînê, aştiyê mayinde bikin em ê bimeşînin. Em her tim alîgirê aştiyê bûn. Me daxwaza jiyana bi hev re ya bi gelan re hetim anîn ziman. Îro jî bi heman rengî, bi daxwaza jiyana bi hev re ya bi xwişk û biratiyê; em ê pêvajoya aştî û civaka demokratîk bi gelan re pêk bînin.”
Engîn Sever jî ragihand ku ji sala 2005’an û pê ve ew ketin nava pêvajoyeke guherîn û veguherînê û got, “Di rêbaza me ya berê ya kar de piştgiriya ji bo têkoşîn û zemîna siyasî ya li Kurdistanê karê sereke bû, êdî em xwe ne piştevan lê belê weke hêmana esasî ya têkoşîna civaka demokratîk dibînin.
Ji bo vê jî em ê karên xwe yên civaka demokratîk ku bi salan e dimeşînin hîn mezin bikin û veguherînin sazîbûneke berfireh.”
Engîn Sever destnîşan kir ku li nava welat û civakên ew di nav de ne wê tevneke têkoşînê ava bikin ku jiyana hevpar esas digirin, bi ziman, dîplomasî, çand û nasnameya xwe hebûna xwe dewam dike û got, “Em ê bi hemû saziyên xwe, bi ruhê seferberiyê di vê pêvajoyê de avakirina civaka demokratîk pêk bînin.”
