Duh şandeyek ya Meclîsa Gel a Mexmûrê ji bo çareserkirina pirsgirêka nasname û ambargoya li ser wargehê, berê xwe da Bexdayê. Lê şande piştî bi Wezareta Edaletê re hevdîtin kir, di vegerê de hate girtin. Xelkê Mexmûrê bi awayekî girseyî li dijî zêdebûna zextên hikûmeta Iraqê yên li ser wargehê dest bi meşê kirin.
Iraq ji 10’ê Nîsanê ve rê nade kel û pel bikevin nava wargehê, rê nade karker biçin ser karên xwe û nasnameyên xelkê wargehê nû nakin. Ji bo çareserkirina pirsgirêka nasname û ambargoya li ser Wargeha Penaberan a Şehîd Rûstem Cûdî (Mexmûr) şandeyek ji Meclîsa Gel ya Mexmûrê duh berê xwe da Bexdayê. Şande piştî bi Wezareta Edaletê re hevdîtin kir û şûnde, di vegerê de hate girtin.
Li gorî agahiyên gihiştine ber destê ajansa me, kesên di Şandeya Meclîsa Gel a Mexmûrê de, Hevserokê Meclîsa Gel a Mexmûr Ehmed Şehbaz, Hevşaredarê Wargehê Edban Yilmaz û Hevberdevkê Komiteya Têkiliyên Derve ya Mexmûrê Bêwar Emîn, li Bexdayê hatîn girtin
Li dijî tundbûna zext û gefên hikûmeta Iraqê yên li ser wargeha Penaberan a Mexmûrê, xelkê Mexmûrê bi dirûşmeya ‘Bijî Berxwedana Mexmûrê’ dest bi meşek girseyî kirin.
Li dijî zext û ambargoya li ser wargehê, bi sedan şêniyên Mexmûrê li ber Saziya Malbatên Şehîdan dest bi meşê kirin.
Şêniyên Mexmûrê heta benda kontrolê ya hêzên hikûmeta Iraqê bi dirûşmeyên ‘Bijî Serok Apo’ û ‘Bijî Berxwedana Mexmûrê’ meşiyan. Xelkê Mexmûrê li ber benda kontrolê rawestane.
Hêjayî gotinêye ku ev zêdeyî du salane nasnameyên penaberên Mexmûrê nayên nûkirin, ji bo vê jî gelek caran di rêyên hatin çûyînê de pirsgirêk ji bo gelê wargehê tê derxistin. Di heman demê de ji 10 Nîsanê ve xala kontrolê ya ketina wargehê ku ji aliyên hêzên leşkerî yên Iraqê ve tê kontrolkirin, nahêlin kel û pelên avahîsaziyan bikevin wargehê. Her ku diçe zext û ambargoya li ser wargehê tê tûnd kirin.
