Gerîlayên jin şehîd Bêrîtan a ku sala 1992’yan çalakiyeke fedayî kir, bi bîr anî û di heman demê de artêşbûna jina azad a di şexsê wê de hatî avakirin, pîroz kir.
ARTÊŞBÛNA JINA AZAD
Di axaftina merasîmê de ev tişt hate gotin:
“Hemû heval dizanin îro salvegera şehadeta heval Bêrîtan e. Di sala 1992’an de heval Bêrîtan çalakiyeke fedayî kir. Em hemû şehîdên şoreşê bi bîr tînin û bejna xwe li hember wan ditewînin. Jineke Dêrsimî ye, li hember dijmin, di nava şer de, li dijî teslîmiyetê serî li çalakiya fedayî da. Li hemberî xeta îxanetkar û noker, serî netewand û biryara xurt a jiyanê da. Rêbertî di şexsê heval Bêrîtan de, artêşbûna jina azad ava kir. Di her çar beşên Kurdistanê de artêşa jinan hate avakirin. Em artêşbûna jina azad, di serî de li Rêber Apo, hemû şehîdan, dayîkên şehîdan û tevahî hevalan pîroz dikin. Em jî weke jin, di artêşa Rojhilatê Kurdistanê de, me di xeta heval Bêrîtan de xwe mezin kir û di Rojhilat de me xwe kir xwedî artêş. Em weke artêşa Rojhilatê Kurdistanê, ji bo ku em li ser lingên xwe bisekinin û li ber xwe bidin, me xwe bi rêxistin kir, me xwe anî wê astê ku, li dijî hemû destdirêjiyên li ser jinan tên kirin, bibin hêza pêşengtî û parastinê. Ji bo vê em vê rojê li tevahî jinên cîhanê jî pîroz dikin.
BANGA JI BO HEMÛ JINAN: XWE RÊXISTIN BIKIN
Li Rojhilatê Kurdistanê jî, gelek jinên me yên pêşeng derketin pêş. Weke şehîd Zîlan Pepûle û şehîd Şêrîn Elemhûlî, ku di zîndanên Îranê de bi berxwedaneke mezin gihîşte şehadetê. Ev berxwedaniya ku heval Bêrîtan raber kiriye, ji bo Rojhilatê Kurdistanê jî bû nimûne û weke xetekê heta niha li ser dimeşin.
Herî dawî jî weke fermandarê me yê hêza jin heval Aryen Arê, xwe di vê xetê de bi pêş xist, perwerde û mezin kir. Em jî weke hêz, weke hêza HPJ’ê şopdarê xeta van hevalên şehîd in.
Em bang li hemû jinên Rojhilatê Kurdistanê û Îranê ve dikin, ku bikaribin xwe bi rêxistin û perwerde bikin. Xwe tevlî têkoşîna ji bo şoreşa azadiyê bikin. Divê em ji bîr nekin ku şoreşa Jin Jiyan Azadî, bingeha xwe ji sekna heval Bêrîtan girtiye. Bingeha vê têkoşîna jinan, sekna heval Bêrîtan e, ji wir derket û îro li hemû cîhanê belav bûye. Ji ber vê jî erka me hemûyan e ku em bi xwe parastinê re, vê xetê biparêzin û wê mezin bikin. Em xwedî li îradeya xwe ya ku nayê şikandin derbikevin.”
