Medyaya dewletê ya Îranê ragihand ku di êrîşa Îsraîlê ya vê siharê de Serokê Fermandariya Giştî Muhammed Bakirî û Fermandarê Parêzvanên Şoreşê yê Îranê Huseyîn Selamî jî di nav de 5 kes mirin û gelek kes birîndar bûne.
Zanyarên nukleer Ferîdun Abbasî û Muhammed Mehdî Tehrançi jî di nava kesên mirî de ne.
Serokwezîrê Îsraîlê Binyamin Netanyahu got, êrîşa Îsraîlê ya li ser Îranê “pir serketî” ye. Netanyahu ev tişt jî got, “Ji bo tunekirina gefa Îranê ya li hemberî hebûna Îsraîlê, me operasyoneke leşkerî da destpêkirin. Ev operasyon heta ku vê gefê bi temamî ji holê radike, wê bidome.”
Wezîrê Parastinê yê Îsraîlê Îsrael Katz piştî êrîşê li seranserî Îsraîlê rewşa awarte ragihand.
Wezîrê Karên Derve yê DYE’yê Marco Rubio diyar kir ku di êrîşa Îsraîlê ya li ser Îranê de ‘rolê wan nîne’.
ÎRAN: EM Ê TUND BERSIV BIDIN
Lîderê dînî yê Îranê Ayetullah Alî Hamaney ev tişt diyar kir: “Îsraîlê destê xwe yê bi xwîn, bi sûckirina li dijî Îranê bi kar anî. Îsraîlê ji bo xwe dawiyeke bi êş amade kir.”
Wezîrê Karên Derve yê Îranê Erakçi diyar kir ku bersiva Îranê ya ji bo Îsraîlê, ‘mafê rewa û qanûnî’ yê Tehranê ye.
Berdevkê Serokatiya Fermandariya Giştî ya Îranê Tuggeneral Ebulfazl Şikarçi got, “Îsraîlê êrîşê xwe yên li ser Îranê bi alîkariya DYE’yê pêk anî. Wê berdêleke giran bidin. Bila li benda bersiva tund a hêzên çekdar ên Îranê bimînin.”
