Îro li baregeha Hizba Şuî Kurdistan ya li Silêmaniyê Rêxistinên ku li ser Jenosîdê kar dikin, bi boneya 37’emîn salvegera Enfalê civînek çapemeniyê lidarxist.
Di civîna çapemeniyê de daxuyanî ji aliyê Bextiyar Mistefa ve hat dayîn û hat gotin: “Berî 37 salan rejîma Baas yek ji tawanên herî mezin ên sedsala bîstan li beramberî gelê Kurd pêk anî. Heta niha bersiva qurbaniyên enfalê nehatiye dayîn. Hikûmeta Herêmê jî alîgirtiya tawanbarên jenosîda enfalê dike.”
Di dewamê de hat gotin ku divê navê tometbarên ku destên wan di jenosîda Enfalê de hene bên dayîna polîsên İnterpolê.
Bextiyar Mistefa çend daxwazek pêşkêşî aliyên peywendîdar kir û daxwaz jî evin;
-Dadgehkirina tawanbarên enfalê ku 20’ê Gulana 2007’an biryara dadgehkirin û girtina hin ji wan hatiye dayîn. Em daxwaz dikin ji aliyê Dadgeha Bilind a Tawanan ve navên wan bên dayîna polîsên İnterpolê.
-Anîna hestiyên qurbaniyan û destpêkirina testên wan ên DNA’yê.
-Divê hikûmeta Iraqê daxwaza lêborînê ji qurbaniyên jenosîdê bike.
-Hemû lîsteyên muçeyên şehîdên jenosîdê, birîndarên çekên kîmyawî, girtiyên siyasî û pêşmergeyên dêrîn bê belavkirin.
-Pêwîste Serbazgeha Topzawa ji rûxînê bê parastin û ji bo qurbaniyên enfalê bibe mûzexane.
-Pêwîste lêkolîn li ser sedemê xirakirina serbazgeha Dubiz ku rawestgeha dawî ya hezaran jin û zarokên enfalkirî bû.
Di dawiyê de jî hat gotin ku tevî ev daxwaz gelek caran hatine kirin, lê heta niha ti tometbarên ku navên wan ji aliyê dadgeha bilind a tawanan ve hatine diyarkirin nehatine dadgehkirin. Her wiha hate gotin ku navê wan kesan ji aliyê hikûmeta Herêmê ve radestî Polîsên İnterpolê nehatine kirin.
