Di konsera bi navê ‘Resîtala Netewî’ de wê 12 hunermend, orkestrayeke mezin û koro derkeve ser dikê. Tevgera Çandê ya Kurd a Ewropayê û Art Record konserê organîze dikin.
Konser wê saet 20.00’an li Kuppelsaalê were lidarxistin, di konserê de her hunermend wê du stranan bêje. Hunermendên ku derkevin ser dikê ev in: Şehrîbana Kurdî, Yalda Abbasî, Çopî, Bermal Çem, Gulseven Medar, Xêro Abbas, Hesen Şerîf, Blind Îbrahîm, Mehmet Akbaş, Mehmet Atlı, Azad Bedran û Dodan.
Di konserê de Erdem Altinses wê şeftiya orkestrayê bike. Altinses aranjesa 26 berhemên ku wê di vê konserê de bên xwendin, jinûve kir. Tenê ji bo aranjeyan mehek û nîv ked da. Altinses ev agahî dan ANF’ê:
ERDEM ALTINSES: EM Ê BI ORKESTRAYEKE XURT LI SER DIKÊ BIN
“Me orkestrayeke 40 kesî ya ku ji enstrumanên cur be cur pêk tê, heye. Tenê wê 26 berhem bên xwendin. Me bi hunermendan û Kerem Çelîk re ji bo hilbijartina berheman biryar da. Min hemû ji bo vê projeyê li gorî orkestrayê eyar kir û sererast kir. Mehek û nîvê min xwar. Piştre min notayên wê derxistin û şand orkestrayê. Piştî ku wan amadekariyên xwe yên şexsî kir, me dest bi provoyan kir.
Altinses diyar kir ku ew bêyî ku cudakariya Rojhilat-Rojava bikin, muzîkan dibêjin û ev tişt got, “Her kes heye û em hewl didin harmoniyekê çêbikin. Zimanê berheman Kurdî ye. Muzikjenên di orkestrayê de jî ji welatên cuda tên. Mîna Elmanya, Çîn, Fransa, Belçîka, Îngilistan, Hollanda… Dîsa koroya me jî reng û reng e. Di koroyê de hevalên ji Amed û Stenbolê tên hene. Em ê bi orkestrayeke xurt li ser dikê bin.”
Erdem Altinses destnîşan kir ku prova pir baş derbas bûne û got, ew hêvîdar e her kes razî bibe.
ELÎ GULER: JI BO VÊ KONSERÊ 6 MEH IN KED TÊ DAYÎN
Koordînatorê ‘Resîtala Netewî’ Elî Guler jî ev tişt got: “Ji 4 parçeyên Kurdistanê 12 hunermend wê hem bi kurmancî, hem dimilî û hem jî soranî stranan bêjin. Tîmeke xurt derket holê. Nêzî 100 kes ji bo vê projeyê xebitîn. Di mehên Sibat-Adarê yên îsal de xebatên amadekariyê derketin pêş. Destpêkê konsept derket holê. Piştre hate xurtkirin û niha gihişte halê xwe. Projeyeke pir girîng derket holê.”
Elî Guler got, gel xwedî li vê konserê derket û destnîşan kir ku ev yek ji bo wan motîvasyoneke cidî ye. Guler bilêv kir ku konsera Hannover wê ji bo konserên nû binesaziyeke pir cidî çêbike û bibe referans.
NÛRÊ DILOVANÎ: EZ PIR KÊFXWEŞ IM KU DI VÊ PROJEYÊ DE ME
Kemanîst û mamosteya muzîkê Nûrê Dilovanî dê weke kemanîsta yekemîn di vê projeyê de cih bigire. Dilovanî got, “Ez pir kêfxweş im ku di vê projeyê de cih digirim. Ji erdnîgariyên pir cuda em muzîkjen hatine ba hev. Em baş xebitîn. Wê bibe konsereke balkêş.”
Nûrê Dilovanî ev bang kir: “Em ê 19’ê Kanûnê li Hannoverê bin. Kerem bikin werin. Wê konsereke pir xweş be. Ez hêvî dikim ku wê mirovên me werin, salon tejî bibe.”
SÎNAN ASYA: ME ÇAR PARÇEYÊN KURDISTANÊ ESAS GIRT
Yek ji kesên ku ji cara ewilî ve di organîzeya konserê de cih digire, endamê Tevgera Çandê ya Kurd a Ewropayê Sînan Asya ye. Asya got, dema konsepta konserê hate amadekirin, çar parçeyên Kurdistanê hate esasgirtin.
Sînan Asya ev tişt jî anî ziman: “Ev konser hunera şoreşgerî û yekîtiya sekna Kurdewar sembolîze dike. Rêbertî pêvajoyek da destpêkirin. Em dixwazin ji wê pêvajoyê re jî bibin bersiv. Girîng e ku civaka me bi hemû rengên xwe were ba hev. 12 hunermendên me yên cuda wê berhemên xwe bêjin.
Em armanc dikin ku li 7 bajarên cuda yên Ewropayê konserên mezin ên wiha lidar bixin. Hannover bajarekî pir zindî ye. Lewma me destpêkê xwest li wir lidar bixin. Di konsera Hannover de 12 hunermendên me dê berhemên xwe bêjin. Di konserên me yên din de hunermendên me yên cuda dê derketin ser dikê. Em armanc dikin ku bi giştî ji bo 90 hunermendên me konserên wiha lidar bixin.”
