Komîteya Têkiliyên Derve ya KCK’ê daxuyaniyek weşand û diyar kir ku di nava du hefteyan de di êrîşên terorê û dagirkeriyê yên dewleta Tirk de 7 kes hatin qetilkirin û got, peymana navbera Enqere û Bexdayê ji bilî ‘dagirkerî û terorê’ wê tiştekî bi xwe re nîne.
DI NAVA 2 HEFTEYAN DE 7 MIROVÊN ME DI ÊRÎŞÊN TERORÊ Û DAGIRKERIYÊ DE HATIN QETILKIRIN
Di daxuyaniyê de hate gotin, “Di nava du rojên dawî de li qadên Bradost û Raperînê di encama êrîşên terorê yên artêşa Tirk a dagirker de şêniyên me Bedî Kemal Mûhammed, Mûzaffer Huseyîn Xidir, Mûhammed Mûzaffer Huseyîn û Mûbîn Mûzaffer Huseyîn şehîd bûn. Beriya niha bi du hefteyan jî li herêma Şarezorê di êrîşê de ji kedkarên pêşeng ên çapemeniya azad Gulistan Tara û Hêro Bahadîn şehîd bûn. Di 31’ê Tebaxê de Hakîm Luqman li Stenbolê tenê ji ber ku bi Kurdî axivî ji aliyê keriyên faşîst ên xwe ji AKP-MHP’ê xwedî dikin, bi xwînxwarî hate qetilkirin. Yanî di nava 2 hefteyan de 7 mirovên me di encama êrîşên terorê û dagirkeriyê yên Tirkiyeyê de şehîd bûn. Bi vê wesîleyê em van êrîşên terorê şermezar dikin, di serî de malbatên şehîdan em sersaxiyê ji gelê Kurdistanê yê welatparêz re dixwazin.
METNA LIHEVKIRINÊ TENÊ TEROR Û KOMKUJIYÊ BI XWE RE TÎNE
Ev şehadet heman piştî mohrkirina metna lihevkirinê ya navbera Tirkiye û Iraqê ya 15’ê Tebaxê pêk hatin. Diyar e ku ev metna lihevkirinê ji bilî teror û komkujiyê tiştekî din ji gelê Kurd û gelên Iraqê re neaniye, wê nîne. Mebesta Tirkiyeyê ji pêşketin, aramî û pêşveçûna aboriyê ya Iraqê teror û komkujî ye. Eşkere bû ku peymana navbera Iraq û Tirkiyeyê hate mohrkirin, wê pêşketinê bi xwe re nîne, wê komkujî û terorê bîne. Gotinên pêşketina aboriyê, ewlekarî, aramî, perwerde û rektorîkên din ji bilî nixumandina vê terorê û komkujiyê nayê ti wateyê.
BI PEYMANÊ RE DAÎŞ JI NÛ VE ANÎN
Encameke din a lihevkirina navbera AKP-MHP-PDK û hikumeta Iraqê, li herêma Behdînanê tê dîtin. Li vê derê çeteyên ji ber DAÎŞ’ê mane û çeteyên cîhadîst ên radîkal di bin sîwana artêşa Tirkiyeyê ya dagirker de li Behdînanê hatine bicihkirin û bi hêsanî tevdigerin. Rojên dawî dîmenên van çeteyan di çapemeniyê de hatin weşandin ku bi liv û tevgera xwe eşkere ye ku DAÎŞ’î ne. Bi van dîmenan ew rastî piştrast bûye ku Gerîlayên Azadiyê yên Kurdistanê li qada şer çavdêriyê dikin, bi raya giştî re parve dikin, lê belê medya şerê taybet a AKP-PDK’ê hewl dide vê rastiyê binixumînin. Artêşa Tirk a dagirker ku ji sala 2021’ê û vir ve newêre li hemberî gerîla şer bike û newêre bikeve tunelên şer ên gerîla, van çeteyan ji bo armanca xwe bi kar tîne. Ev çeteyên ku di encama têkoşîna Gerîlayên Azadiyê yên Kurdistanê, Pêşmerge û artêşa Iraqê û bi dayina berdêlên giran ji Kurdistan û Iraqê hatin paqijkirin, niha weke encameke vê lihevkirina navbera hikumeta Iraqê û Tirkiyeyê bi rengekî fermî li Kurdistanê û Iraqê têne vegerandin. Hikumeta Iraqê bi vê lihevkirinê re tifaqa AKP-MHP-DAÎŞ-PDK, dagirkirina Iraqê ji aliyê Tirkiye û DAÎŞ’ê ve, jinûve zindîkirina DAÎŞ’ê û bicihkirina li Iraqê û Kurdistanê rewa kiriye.
TIRKIYE ÇETEYAN JI BO PLANÊN XWE YÊN DAGIRKERIYÊ BI KAR TÎNE
Tirkiye zêdeyî 10 sal in bi rêya DAÎŞ’ê û komên çete yên mîna wê terorê li gelên Rojhilata Navîn bi taybetî jî li gelê Kurd dike, van çeteyan ji bo planên xwe yên dagirkeriyê bi kar tîne. Di vê çarçoveyê de ji Azerbaycanê û Ermenistanê heta bi Lîbya, Sûdan, Somalî û Cezayîrê, ji wir jî heta bi kolanên Parîs û Berlînê ev çete bi kar aniye. Di sala 2014’an de çawa ku Tirkiyeyê berê DAÎŞ’ê ji Şamê da Kobanê, ji Bexdayê da Mûsil, Şengal, Kerkûk û Hewlêrê, niha jî heman çete ji Idlibê aniye Amediyê, Zaxo û Dihokê.
GEFA QIRKIRIN Û GUHERTINA DEMOGRAFÎK
Çeteyên DAÎŞ’ê bi rêya PDK û Tirkiyeyê li Başûrê Kurdistanê, li deverên stratejîk ên Kurdistanê hatine bicihkirin ku ev yek ji bo dema dirêj gefeke qirkirinê û guhertina demografîk a li ser gelên Iraqê û gelê Başûr e. Em ji bîr nekin, DAÎŞ’ê piştî ku bi PDK’ê re li hev kir, kete Şengalê. Niha jî bi PDK’ê re li hev kiriye û ketiye Behdînanê. Ti garantî nîne ku tiştên DAÎŞ’ê li xelkê Şengalê kir li xelkê Dihok, Zaxo û Amediyê neke. Berevajî vê yekê metirsiyeke rasteqîn a bi vî rengî heye. Karê ku DAÎŞ û Tirkiyeyê heta niha bi hev re kirine, nîşaneya karê wan ê ji niha û pê ve ye.
GERÎLA BI RENGEKÎ DÎROKÎ LI BER XWE DIDE
Gerîlayên Azadiyê yên Kurdistanê çawa ku li dijî terora DAÎŞ’ê ya ku piştgiriyê ji Tirkiyeyê werdigire li refên herî pêş şer kirin, hebûna gelên Rojhilata Navîn bi taybetî jî hebûna gelê Kurd parastin, niha jî li dijî êrîşên dagirkerî û îlhaqê yên Tirkiyeyê ku piştgiriyê ji DAÎŞ’ê werdigire, li gel hemû zor û zehmetiyan li refên herî pêş bi rengekî dîrokî û destanî li ber xwe didin. Berxwedana beriya 10 salan a li Şengal û Hewlêrê, Hewlêr û Kerkûkê ya li dijî DAÎŞ’ê dihate kîjan wateyê, berxwedana niha ya li Zap, Metîna û Avaşînê ya li dijî êrîşên dagirkeriyê yên dewleta Tirk jî tê heman wateya dîrokî. Êrîşên Tirkiye û DAÎŞ’ê dewama hev in û êrîşên qirkirinê ne ku hevdu temam dikin.
LIHEVKIRINA BI ERDOGAN RE LIHEVKIRINA BI DAÎŞ’Ê RE YE
Girêdayî vê yekê di vê têkoşîna pîroz de em bang li gelên Iraqê û bi taybet jî gel, ciwan, jin û rewşenbîrên Başûrê Kurdistanê dikin ku xwedî li têkoşîna Gerîlayên Azadiya Kurdistanê derkevin û tevlî bibin. Em bang li hikûmeta Iraqê, serok û partiyên wê siyasî dikin ku lihevkirina li gel Recep Tayîp Erdogan tê wateya lihevkirina li gel DAÎŞ’ê û ev yek teqez berovajî berjewendiyên gel û dewleta Iraqê ye. Planên dîktatorê faşîst Erdogan ne bi stûxwarkirin û rewakirinê, wê bi têkoşînê werin pûçkirin. Demildest betalkirina peymana bi dewleta Tirk re wê di çarçoveya berjewendiyên hikûmeta Iraqê de be û wê zirar û talûkeyên ku di paşerojê de derkevin holê, berteraf bike.”
