Konseya Rêveber a Kongreya Neteweyî ya Kurdistanê (KNK) têkildarî êrişa komeke çekdar a li Serêkaniyê ya li dijî malbatên Serêkaniyê yên li warê xwe vegeriyan daxuyaniyek da.
Di destpêka daxuyaniyê de hate bibîrxistin ku vegera koçberan a li cih û warê xwe di çarçoveya peymana 29’ê Çileyê ya navbera Rêveberiya Xweser û hikumeta demkî ya Şamê de pêk tê û hate gotin, “Li gorî şertên peymana ku bi Şamê re hatibû kirin, 410 malbatên Kurd ên ku berê xwe dabûn bajarên xwe, dema gihîştin Serêkaniyê, ji aliyê hinek hêzên çekdar ên aligerên HTŞ’ê ve rastî êrîşên bi kevir, dar û çekan hatin. Di vê êrişê de gelek kes birîndar bûn û gelek zererên madî jî pêk hatin. Ev êriş ne êrîşeke tesedûf e, plankirî û bi organîze ye û di bin agahdarî û erêkirina rayedarên Şamê pêk hatiye.
Li gorî peyman û li hevkirina bi hukumeta Şamê re, hatibû pêşbînîkirin ku hikûmeta demkî ya Sûriyê dê gavên pêwîst bavêje, ji bo parastina mal û milkên koçberan, xanî, kelûpel û milkên wan li xwediyên wan vegerîne û kesên ne xelkê wî bajarî ji bajaran dûr bixe. Di hevdîtina xwe ya herî dawî de jî ya bi Sekreterê Giştî yê Neteweyên Yekbûyî Antonio Guterres re, hikûmeta Şamê piştrast kiribû ku ew ê rêzê li mafên mirovan û hiqûqa navneteweyî bigire.”
KNK’ê diyar kir ku cudahiya di navbera gotin û kirinên rejîma Şamê de, di êrişên dawî yên li ser Kurdên ku vedigeriyan malên xwe yên li Serêkaniyê de, careke din eşkere bû.
Daxuyaniya KNK’ê bi vî rengî dewam kir: “Divê Neteweyên Yekbûyî, bi lezgînî mudaxeleya vî karî bike, bi hikûmeta Şamê re bikeve nava peywendiyan, hikumeta Şamê hişyar bike û ji bo çareserkirina vê pirsgirêkê destwerdanê bike.
Birêz Barham Salih, berpirsê penaberan yê Neteweyên Yekbûyî duh got ku zêdebûna vegerê û pêdiviyên milyonan kesên ku hîn jî koçber in, piştgiriyeke navneteweyî ya berdewam hewce dike. Ji ber vê yekê divê UNHCR vegereke ewle ji bo xelkê Serêkaniyê û hemî koçberan misoger bike.”
Konseya Rêveber a KNK’ê bi vê munasebetê bang li hikûmeta demkî ya Şamê kir ku pabendiyên xwe bi cih bîne û tavilê êrişên hêzên çekdar (ku girêdayî wana ne) yên li ser Kurdan rawestînin.
Di dawiya daxuyaniyê de hate gotin, “KNK êrişa Serêkaniyê û êrîşkaran bi tundî şermezar dike, bang li hemû rêxistinên Kurdistanî û gelê Kurd dike ku ji bo piştgiriya gelê Serêkaniyê dengê xwe bilind bikin û bi hemî awayî xwedî li koçberan û hemî gelê rojavaya Kurdistanê derkevin.”
