KON-MED’ê bi peyamekê cejna Remezanê pîroz kir.
Peyama KON-MED’ê bi vî rengî ye:
“Alema Îslamê piştî meha Remezanê wê sê rojan Cejna Remezanê pîroz bike. Em hêvî dikin ku cejna Remezanê bibe sedema aştî û biratiyê.
Hêzên kolonyalîst bi şerê qirêj ê ku li welatê me Kurdistanê li ser gelê me dimeşînin, qirkirina siyasî, çandî, civakî û aborî didomînin. Yek ji mezintirîn amûrên şerê taybet jî ên ku hêzên mêtingeriyê li ser gelê me bi kar aniye mijara olî ye.
Gelê Kurdistanê ti carî vê cîhana zilmê ya li ser navê Îslamê hatiye avakirin qebûl nekiriye û bi pêşengiya fîlozofê mezin Rêber Apo bi salane ji bo nirxên mirovahiyê têkoşîna xwe ya hebûnê dimeşîne.
Armanca sereke ya têkoşîna me ew e ku em cejnan ji îstîsmaran rizgar bikin. Di nav civakan de hesta aştî û biratiyê biafirînin û geş bikin û ji bo ku civak bikarin li gorî cewher û wateya cejnan a rasteqîn bijîn.
Weke KON-MED em cejna Remezanê li Rêberê Gelê Kurd Abdullah Ocalan, gelê me yê li çar parçeyên Kurdistanê û derveyî welat, malbatên şehîdan, hevalên me yên li zindanan û li hemû qadên têkoşînê pîroz dikin. Bi hêviya ku em weke civak li ser xaka Kurdistanek azad cejnan bi hev re pîroz bikin.”
